​ម៉ូតូ​ទឹក​៖ កីឡាករ​ម៉ូតូ​ទឹក​ឆ្នើម​កម្ពុជា សាលី អ៊ូ​មើ​ត បាន​ផ្ដាំ​ទៅ​គូប្រជែង​របស់​ខ្លួន​តាមរយៈ​អ្នក​សារព័ត៌មាន​ថៃ​ថា បើ​ម៉ូតូ​ទឹក​ខ្លួន​មិន​ខូច​ទេ កុំ​សង្ឃឹម​បាន​នៅមុខ​ខ្លួន។ ការ​ថ្លែង​បែបនេះបន្ទាប់ពី អ៊ូ​មើ​ត បាន​វាយបក​ដណ្ដើម​ចំណាត់ថ្នាក់​លេខ​១ ត្រឡប់មកវិញ​ក្នុង​ជុំ​ទី​៣ នៃ​ការប្រកួត​កីឡា​ម៉ូតូ​ទឹក​ពានរង្វាន់​អន្ដរជាតិ Jet Ski Pro Tour 2021 នៅ​ប្រទេស​ថៃកាលពី​ចុង​សប្ដាហ៍​កន្លងទៅ។

​ក្នុងការ​ប្រកួត​វិញ្ញាសា Pro Am Ski Modified ជុំ​ទី​៣ ឬ​ដំណាក់កាល​ទី​៣ នេះ អ៊ូ​មើ​ត ធ្វើបាន​យ៉ាង​ល្អឥតខ្ចោះដែល​គេ​ហៅថា Perfect Games បន្ទាប់ពី​ដណ្ដើមបាន​លេខ​១ ទាំង ៤​ជុំ ផ្ទុយ​កាលពី​ជុំ​ទី​២ ចុងខែ​មុនដែល​ម៉ូតូ​ខ្លួន​មាន​បញ្ហាមិនអាច​បន្ដ​ការប្រកួត​បាន ធ្វើ​ឲ្យ​រូបគេទទួលបាន​ត្រឹម​ចំណាត់ថ្នាក់​លេខ​៤ ក្រោយ​គ្រង​ចំណាត់ថ្នាក់​លេខ​១ កាលពី​ដំណាក់កាល​ទី​១។​ ​ម្ចាស់​មេដាយមាស​កីឡា​អាស៊ី​របស់​កម្ពុជា​រូបនេះបាន​សង្កត់ធ្ងន់ថា ការធ្វើ​បាន Perfect Game គឺជា​រឿង​ដ៏​លំបាកដែល​កម្រ​នឹង​ធ្វើបាន។ តែ​កីឡាករ​ជម្រើសជាតិ​ម៉ូតូ​ទឹកកម្ពុជា​រូបនេះបាន​ផ្ដាំ​ដល់​គូប្រជែង​របស់ខ្លួន​ថា បើ​ម៉ូតូ​ទឹក​របស់គេមិនមាន​បញ្ហា ឬ​ខូច កុំ​សង្ឃឹមថាបាន​នៅមុខ​ខ្លួន ហើយ អ៊ូ​មើ​ត ប្ដេជ្ញា​នឹងដណ្ដើមពាន​នេះ​មក​គ្រង​ឲ្យ​ខាន​តែ​បានក្នុង​ឆ្នាំ​២០២១ នេះ​ទៀតផង។​

​

​ចំណែក​លទ្ធផល​របស់​កីឡាករ​ជម្រើសជាតិ​ម៉ូតូ​ទឹក​កម្ពុជា ៤​រូប​ផ្សេងទៀតរួមមាន​កីឡាករ ម៉ី​ន មូ​ស្ដា​ន ដែល​ប្រកួត​វិញ្ញាសា Pro Am Ski Modified ជាមួយ សាលី អ៊ូ​មើ​ត និង​ទទួលបាន​លេខ​១ កាលពី​ជុំ​ទី​២ បាន​ធ្លាក់​មកឈរ​លេខ​៣។ រីឯ​កីឡាករ កៃ វ៉ាន់​ស៊ី​ដែន និង​កីឡាករ សាលី ហ្វី​លីន ទទួលបាន​ចំណាត់ថ្នាក់​លេខ​៤ ដូចគ្នាលើ​វិញ្ញាសា​ស្គី​ឈរ និង​ស្គី​អង្គុយ ខណៈ​កីឡាករ មីន អូស្មាន់ ទទួលបាន​ចំណាត់ថ្នាក់​លេខ​៦។​ ​ជាមួយ​លទ្ធផល​នេះទោះ​ពុំ​ទទួលបាន​ពាន​ប្រចាំ​ជុំ​ក៏ពិតមែន តែ សាលី អ៊ូ​មើ​ត បាន​វាយតម្លៃ​ខ្ពស់សមិទ្ធផល​ដែល​សិស្ស​ប្អូន​ធ្វើបាន ដ្បិត​ពួកគេ​ប្រើ​ម៉ូតូ​ចាស់តាំងពី​ឆ្នាំ​២០១៧។ តែបើ​និយាយ​ពី​កម្រិត​សមត្ថភាព និង​បច្ចេកទេសបានបង្ហាញ​សុទិដ្ឋិនិយមចំពោះ​ពួកគេ ហើយ​សង្ឃឹមថា កីឡាករ​ម៉ូតូ​ទឹក​វ័យក្មេង​កម្ពុជា​ទាំងអស់នឹង​បន្ដ​ការខិតខំ​ប្រឹង ដើម្បី​ពង្រឹងសមត្ថភាព និង​បទពិសោធន៍​ត្រៀមឆ្ពោះទៅ​ស៊ី​ហ្គេមឆ្នាំ​២០២៣ នៅ​កម្ពុជា៕

​អត្ថបទ៖ លី ឈុន​ឡា