ប្រទេសចិន និងឥណ្ឌូនេស៊ី បានបើកកិច្ចប្រជុំថ្នាក់រដ្ឋមន្ត្រីលើកដំបូងរបស់ប្រទេសទាំង២ ក្រោមទម្រង់ដែលបានព្រមព្រៀងគ្នា នៅឆ្នាំ២០២៤ ជាជំនួបដែលកើតមានឡើងស្របនឹងការជំរុញរបស់ទីក្រុងប៉េកាំង ក្នុងការបញ្ចុះបញ្ចូលបណ្ដាប្រទេសអាស៊ី និងដោះស្រាយភាពតានតឹងពាណិជ្ជកម្មជាមួយសហរដ្ឋអាមេរិក។

នៅឯសន្និសីទសារព័ត៌មាន ក្នុងទីក្រុងប៉េកាំង បន្ទាប់ពីមានកិច្ចពិភាក្សា នាថ្ងៃចន្ទ (ទី២១ ខែមេសា) នេះ រដ្ឋមន្ត្រីការបរទេសចិន លោក Wang Yi បាននិយាយថា ទិដ្ឋភាពអន្តរជាតិប្រឈមនឹង «ផលប៉ះពាល់យ៉ាងធ្ងន់ធ្ងរ ដោយសារចំណាត់ការឯកតោភាគីនិយម និងអនុត្តរភាព» ដោយលោកបានបន្ថែមថា «បរិយាកាសខាងក្រៅកាន់តែស្មុគស្មាញ និងប្រែប្រួល កាន់តែមានសារៈសំខាន់ ដែលប្រទេសចិន និងឥណ្ឌូនេស៊ី ត្រូវមានសាមគ្គីភាព និងកិច្ចសហប្រតិបត្តិការ»

លោក Wang ត្រូវបានចូលរួមប្រជុំដោយរដ្ឋមន្ត្រីការពារជាតិចិន លោក Dong Jun និងរដ្ឋមន្ត្រីការបរទេស លោក Sugiono និងរដ្ឋមន្ត្រីការពារជាតិ លោក Sjafrie Sjamsoeddin របស់ប្រទេសឥណ្ឌូនេស៊ី។

លោក Sjamsoeddin បាននិយាយថា កិច្ចប្រជុំនេះ បានបង្ហាញពី «តម្លៃនៃការធ្វើឲ្យកិច្ចសហប្រតិបត្តិការ ឥណ្ឌូនេស៊ី-ចិនកាន់តែស៊ីម្រៅ នៅក្នុងវិស័យការពារជាតិ» ដោយបានចង្អុលបង្ហាញពី «ការផ្លាស់ប្តូរយោធាកម្រិតខ្ពស់ និងទៀងទាត់ ការហ្វឹកហ្វឺនរួមគ្នា» និងការសហការគ្នា រវាងយោធា និងឧស្សាហកម្មការពារជាតិរបស់ប្រទេស។

ជាមួយគ្នានេះ ភាគីទាំង២ ក៏បានប្រកាសផងដែរ អំពីផែនការធ្វើសមយុទ្ធយោធារួមគ្នា នៅឆ្នាំ២០២៥ ជាសញ្ញានៃការលើកកម្ពស់ទំនាក់ទំនងសន្តិសុខ រវាងប្រទេសដែលមានការខ្វែងគំនិតគ្នាជាយូរអង្វែងហើយ នៅក្នុងបញ្ហាសមុទ្រចិនខាងត្បូង៕