ទូកក្ដោង៖ ការប្រកួតកីឡាទូកក្ដោងជ្រើសរើសជើងឯកអាស៊ីអាគ្នេយ៍ឆ្នាំ២០២១ នៅខេត្តព្រះសីហនុនឹងប្រព្រឹត្តទៅនាចុងសប្ដាហ៍នេះហើយចាប់ពីថ្ងៃទី១២ ដល់ថ្ងៃទី១៧ ខែធ្នូ ដោយមានប្រតិភូ និងអត្តពលិកសរុបចំនួន ៤ប្រទេសចូលរួមរួមមានសិង្ហបុរី ថៃ ម៉ាឡេស៊ី និងម្ចាស់ផ្ទះកម្ពុជា។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC និងជាអនុប្រធានអចិន្ដ្រៃយ៍នៃគណៈកម្មការរៀបចំនេះបានបញ្ជាក់ថា ប្រតិភូ និងកីឡាករដែលនឹងចូលរួមការប្រកួតនេះមានចំនួន ៣៤នាក់ដែលគ្រោងនឹងមកដល់កម្ពុជានាថ្ងៃទី១០-១១ ខែធ្នូខាងមុខ។ រីឯអាជ្ញាកណ្ដាល-ចៅក្រម និងជំនាញការរៀបចំការប្រកួតអន្ដរជាតិបានមកដល់កម្ពុជាហើយកាលពីម្សិលមិញ។ ក្នុងនាមម្ចាស់ផ្ទះ កម្ពុជាបានត្រៀមខ្លួនរួចរាល់ដើម្បីទទួលបដិសណ្ឋារកិច្ចប្រតិភូ អត្តពលិក និងភ្ញៀវជាតិ-អន្ដរជាតិ ទាំងការស្នាក់នៅ-ហូបចុក សន្ដិសុខ-សណ្ដាប់ធ្នាប់ និងការរៀបចំទីលានប្រកួតជាដើម ពោលគឺរង់ចាំតែថ្ងៃប្រកួតមកដល់ប៉ុណ្ណោះ។ គណៈកម្មការរៀបចំការប្រកួតបានប្ដេជ្ញានឹងធ្វើការទទួលបដិសណ្ឋារកិច្ចភ្ញៀវឲ្យបានល្អបំផុត ហើយសង្ឃឹមថា ព្រឹត្តិការណ៍នេះនឹងដំណើរការដោយជោគជ័យផងដែរ។
រដ្ឋលេខាធិការក្រសួងទេសចរណ៍ដដែលបន្ថែមថា តាមរយៈការធ្វើម្ចាស់ផ្ទះព្រឹត្តិការណ៍កីឡាទូកក្ដោងអន្ដរជាតិនេះ នឹងបង្ហាញឲ្យឃើញពីវឌ្ឍនភាពក៏ដូចជាភាពរីកចម្រើន ការអភិវឌ្ឍន៍ និងភាពទំនើបនៃក្រុងព្រះសីហនុដល់ភ្ញៀវទេសចរជាតិ-អន្ដរជាតិថា ក្រុងព្រះសីហនុបានបើកទទួលភ្ញៀវទេសចរយ៉ាងកក់ក្ដៅជាទីបំផុត។ គួរដឹងថា កម្មវិធីប្រកួតនេះរៀបចំឡើងក្រោមកិច្ចសហការរវាងសហព័ន្ធកីឡាទូកក្ដោងកម្ពុជា និងសហព័ន្ធកីឡាទូកក្ដោងសិង្ហបុរី ក្រោយទទួលបានការអនុញ្ញាតជាគោលការណ៍ពីរាជរដ្ឋាភិបាល និងទទួលបានការគាំទ្រពេញទំហឹងពីគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣។ ពិធីបើកការប្រកួតនេះនឹងធ្វើឡើងនាថ្ងៃទី១២-ធ្នូ មុនការប្រកួតផ្លូវការនៅថ្ងៃបន្ទាប់ដែលធ្វើឡើងក្រោមពាក្យស្លោក «យើងទាំងអស់គ្នា ស្រលាញ់កីឡាទូកក្ដោង»៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
