ខុទ្ធការល័យរបស់លោក Modi បាននិយាយកាលពីថ្ងៃចន្ទថា អនុប្រធានាធិបតីសហរដ្ឋអាមេរិក លោក JD Vance និងនាយករដ្ឋមន្ត្រីឥណ្ឌា លោក Narendra Modi បានស្វាគមន៍ចំពោះវឌ្ឍនភាពដ៏សំខាន់ក្នុងកិច្ចពិភាក្សាសម្រាប់កិច្ចព្រមព្រៀងពាណិជ្ជកម្មដំបូងរវាងប្រទេសទាំងពីរ ខណៈទីក្រុង New Delhi ប្រញាប់ប្រញាល់បញ្ចៀសការដំឡើងពន្ធរបស់អាមេរិក និងបង្កើនទំនាក់ទំនងជាមួយរដ្ឋបាលរបស់លោក Trump។

មន្ត្រីសហរដ្ឋអាមេរិកបាននិយាយថា លោក Vance បានទៅដល់ប្រទេសឥណ្ឌាកាលពីថ្ងៃចន្ទ សម្រាប់ដំណើរទស្សនកិច្ចផ្ទាល់ខ្លួនរយៈពេលបួនថ្ងៃជាមួយក្រុមគ្រួសាររបស់លោក ដែលរួមមានការទៅទស្សនា ប្រសាទTaj Mahal និងថ្លែងសុន្ទរកថានៅទីក្រុង Jaipur ។

យោងតាមសេចក្តីថ្លែងការណ៍ពីការិយាល័យរបស់លោក Modi បាននិយាយបន្ទាប់ពីកិច្ចពិភាក្សាថា មេដឹកនាំទាំងពីរ បានលើកឡើងពីការបន្តកិច្ចខិតខំប្រឹងប្រែងឆ្ពោះទៅរកការពង្រឹងកិច្ចសហប្រតិបត្តិការក្នុងវិស័យថាមពល ការពារជាតិ និងបច្ចេកវិទ្យាជាយុទ្ធសាស្ត្រ ក្នុងចំណោមបញ្ហាដទៃទៀត។

មេដឹកនាំទាំងពីរក៏បានពិភាក្សាអំពី «បញ្ហាក្នុងតំបន់ និងពិភពលោក» និងបានអំពាវនាវឱ្យមានការសន្ទនា និងផ្នែកការទូតជាមធ្យោបាយឈានឆ្ពោះទៅមុខ។

សេចក្តីថ្លែងការបាននិយាយបន្ថែមថា លោកនាយករដ្ឋមន្រ្តីឥណ្ឌា បានផ្ញើសារស្វាគមន៍យ៉ាងកក់ក្តៅរបស់លោកទៅកាន់ប្រធានាធិបតី Donald Trump និងបាននិយាយថាលោកទន្ទឹងរង់ចាំដំណើរទស្សនកិច្ច មកកាន់ប្រទេសឥណ្ឌានៅចុងឆ្នាំនេះ។