នាយករដ្ឋមន្ត្រីកាណាដា លោក Mark Carney នាំមុខបេក្ខជនផ្សេងទៀតក្នុងការស្ទង់មតិ ជាមួយនឹងការគាំទ្រសាធារណៈ ៤៣,៧% ក្នុងការបោះឆ្នោតថ្ងៃទី២៨ ខែមេសា ខាងមុខ ខណៈប្រទេសនេះឈានចូលសប្តាហ៍ចុងក្រោយនៃយុទ្ធនាការបោះឆ្នោត ហើយលោក Carney បានអំពាវនាវជាថ្មីកាលពីថ្ងៃចន្ទឱ្យអ្នកបោះឆ្នោតផ្តល់អាណត្តិដ៏រឹងមាំដល់លោក ដើម្បីដោះស្រាយជាមួយនឹងការគំរាមកំហែងពន្ធរបស់លោកប្រធានាធិបតីអាមេរិក Donald Trump។

លោក Carney និយាយថា ការដំឡើងពន្ធរបស់លោក Trump និងការលើកឡើងពីការដាក់កាណាដាជារដ្ឋទី៥១ របស់អាមេរិក បានបង្កការគំរាមកំហែងដ៏ធំ ហើយមានន័យថា កាណាដាត្រូវតែកាត់បន្ថយការពឹងផ្អែកលើអាមេរិក និងរៀបចំរចនាសម្ព័ន្ធសេដ្ឋកិច្ចរបស់ខ្លួនឡើងវិញ។

លោក Carney អតីតបុគ្គលិកធនាគារកណ្តាលវ័យ ៦០ឆ្នាំ ដែលមិនមានបទពិសោធន៍នយោបាយពីមុនមកនៅមុនពេលឈរឈ្មោះជាមេដឹកនាំក្រុមសេរីនិយមកាលពីដើមឆ្នាំនេះ បានហៅខ្លួនលោកថាជា "អ្នកដែលចេះចរចា និងចេះមធ្យោបាយគ្រប់គ្រងវិបត្តិ"។

លោក Carney បានជំនួសតំណែងលោក Justin Trudeau ដែលកាន់អំណាចអស់ជាង ៩ឆ្នាំ ហើយជាចំណុចផ្តោតនៃការវាយប្រហាររបស់បក្សប្រឆាំង អំពីរឿងអតិផរណា កម្រិតអន្តោប្រវេសន៍ខ្ពស់ និងវិបត្តិលំនៅដ្ឋាន។ ការិយាល័យបោះឆ្នោតកាណាដា បាននិយាយថា មនុស្ស ២លាននាក់ ដែលជាតួលេខកំណត់ត្រា បានទៅបោះសន្លឹកឆ្នោតរបស់ពួកគេនៅក្នុងថ្ងៃដំបូងនៃការបោះឆ្នោតមុនកំណត់កាលថ្ងៃសុក្រសប្ដាហ៍មុន ខណៈប្រជាជនកាណាដាប្រហែល ២៨លាននាក់ បានចុះឈ្មោះបោះឆ្នោត៕