ប្រធានាធិបតី Donald Trump បាននិយាយកាលពីថ្ងៃចន្ទថា លោកឈរនៅពីក្រោយរដ្ឋមន្ត្រីការពារជាតិអាមេរិក លោក Pete Hegseth បន្ទាប់ពីមានសេចក្តីរាយការណ៍ថា លោកបានចែករំលែកព័ត៌មានលម្អិតនៃការវាយប្រហារកាលពីខែមីនាលើក្រុមហ៊ួទី នៅប្រទេសយេម៉ែននៅក្នុងក្រុមផ្ញើសារដែលរួមមានភរិយា បងប្អូនប្រុស និងមេធាវីផ្ទាល់ខ្លួន របស់លោក។

ការទម្លាយព័ត៌មានដែលថា លោក Hegseth បានប្រើប្រាស់ប្រព័ន្ធបញ្ជូនសារទូទៅ Signal ដើម្បីចែករំលែកព័ត៌មានលម្អិតអំពីសន្តិសុខសម្ងាត់កម្រិតខ្ពស់លើកទីពីរ កើតមានឡើងក្នុងពេលមិនច្បាស់លាស់សម្រាប់លោក និងមន្ទីរបញ្ចកោណ ជាកន្លែងដែលមន្ត្រីជាន់ខ្ពស់ច្រើននាក់ត្រូវបានបណ្តេញចេញកាលពីសប្តាហ៍មុន ជាផ្នែកមួយនៃការស៊ើបអង្កេតនៃការបែកធ្លាយផ្ទៃក្នុង។

លោក Trump បាននិយាយថា លោក Hegseth កំពុងធ្វើការងារដ៏អស្ចារ្យ។ មនុស្សគ្រប់គ្នាសប្បាយចិត្តជាមួយគាត់។ នៅពេលត្រូវបានសួរថាតើលោកនៅតែជឿជាក់លើ លោក Hegseth ឬយ៉ាងណា នោះ លោក Trump បាននិយាយថា «អូ! ជាទូទៅពិតជាអញ្ចឹង។

យោធាអាមេរិក ដែលស្ថិតនៅក្រោមការដឹកនាំរបស់លោក Trump បានបង្កើនយុទ្ធនាការទម្លាក់គ្រាប់បែករបស់ខ្លួនប្រឆាំងក្រុមហ៊ួទីគាំទ្រដោយអ៊ីរ៉ង់។

អ្នកនាំពាក្យសេតវិមាន លោកស្រី Karoline Leavitt បានបដិសេធសេចក្តីរាយការណ៍របស់វិទ្យុ National Public Radio ដែលថារដ្ឋបាល លោក Trump បានចាប់ផ្តើមស្វែងរករដ្ឋមន្ត្រីការពារជាតិថ្មី។