មន្ត្រីជាន់ខ្ពស់ប៉ាឡេស្ទីនម្នាក់ដែលដឹងពីការចរចាបទឈប់បាញ់អ៊ីស្រាអែល-ហាម៉ាស បានប្រាប់សារព័ត៌មាន BBC ថា អ្នកសម្របសម្រួលកាតា និងអេហ្ស៊ីប បានស្នើឡើងនូវរូបមន្តថ្មីដើម្បីបញ្ចប់សង្គ្រាមដ៏បង្ហូរឈាមនៅដែនដីហ្កាហ្សា។

មន្រ្តីហាម៉ាសរូបនោះនិយាយថា សំណើថ្មីនោះបង្ហាញពីបទឈប់បាញ់ដែលមានរយៈពេលពី ៥ ទៅ ៧ឆ្នាំ ការដោះលែងចំណាប់ថ្នូរអ៊ីស្រាអែលទាំងអស់ដោះដូរនឹងអ្នកទោសប៉ាឡេស្ទីន ការបញ្ចប់សង្រ្គាមជាផ្លូវការ និងការដកទ័ពអ៊ីស្រាអែលទាំងស្រុងចេញពីហ្កាហ្សា។ គណៈប្រតិភូជាន់ខ្ពស់របស់ក្រុមហាម៉ាស ឆ្ពោះទៅទីក្រុងគែរ ដើម្បីពិភាក្សារឿងនេះ។

គួរឱ្យដឹងថា បទឈប់បាញ់ចុងក្រោយបានដួលរលំកាលពីមួយខែមុន នៅពេលអ៊ីស្រាអែល បានបន្តទម្លាក់គ្រាប់បែកលើតំបន់ហ្កាហ្សាឡើងវិញ ដោយភាគីទាំងពីរបានបន្ទោសគ្នាទៅវិញទៅមកចំពោះការបរាជ័យក្នុងការបន្តបទឈប់បាញ់។ អ៊ីស្រាអែល មិនបានធ្វើអត្ថាធិប្បាយលើផែនការថ្មីរបស់អ្នកសម្រុះសម្រួលនេះទេ។

ដំណឹងនេះកើតឡើងប៉ុន្មានថ្ងៃប៉ុណ្ណោះ បន្ទាប់ពីហាម៉ាស បានច្រានចោលសំណើចុងក្រោយរបស់អ៊ីស្រាអែល ដែលរួមបញ្ចូលការទាមទារឱ្យក្រុមនេះទម្លាក់អាវុធជាថ្នូរនឹងបទឈប់បាញ់ ៦សប្តាហ៍។ ខណៈដែលលទ្ធភាពជោគជ័យនៃសំណើថ្មីនេះនៅមិនទាន់ច្បាស់នៅឡើយ ប្រភពបានពណ៌នាកិច្ចខិតខំប្រឹងប្រែងសម្របសម្រួលបច្ចុប្បន្នថា "ម៉ឺងម៉ាត់ខ្លាំង" ហើយនិយាយថា ក្រុមហាម៉ាស បានបង្ហាញពី "ភាពបត់បែនដែលមិនធ្លាប់មានពីមុនមក"៕