កណ្តឹងព្រះវិហារត្រូវបានរោទ្ធិ៍ឡើងជាសញ្ញាបញ្ជាក់ពីការកាន់ទុក្ខ។ ក្រុមអ្នកបួងសួងបានសម្រុកចូលកាន់ទីសការៈនានានៅតាមបណ្ដាប្រទេសជាច្រើនជុំវិញពិភពលោក ដើម្បីបង្ហាញការគោរពចំពោះសម្តេចប៉ាបហ្វ្រង់ស៊ីស កាលពីថ្ងៃចន្ទដើមសប្ដាហ៍នេះ បន្ទាប់ពីបុរីវ៉ាទីកង់ បានប្រកាសពីការយាងចូលទិវង្គតរបស់បុព្វជិតសាសនាអង្គនេះ ក្នុងព្រះជន្ម ៨៨ ព្រះវស្សា។

លោកប្រធានាធិបតីអាមេរិក Donald Trump បានបង្ហោះនៅលើបណ្ដាញសង្គម Truth Social ថា សូមព្រះអង្គប៉ាប ហ្វ្រង់ស៊ីស យាងទៅកាន់សុគតិភព។សូមព្រះជាម្ចាស់ប្រទានពរដល់អស់អ្នកដែលស្រឡាញ់និងអ្នកគោរពព្រះអង្គ។

ចំណែកព្រះមហក្សត្រ Charles និងនាយករដ្ឋមន្រ្តីអង់គ្លេសលោក Keir Starmer បានចូលរួមជាមួយបណ្ដាមេដឹកនាំពិភពលោកផ្សេងទៀតគោរពព្រះវិញ្ញាណក្ខន្ធសម្តេច ប៉ាប ហ្វ្រង់ស៊ីស ។

រីឯបណ្ដាមេដឹកនាំអាមេរិកឡាទីនកាលពីថ្ងៃចន្ទនោះដែរ បានបង្ហាញការសោកស្ដាយនិងសមានទុក្ខចំពោះការបាត់បង់សម្តេចប៉ាប ហ្វ្រង់ស៊ីស នៅក្នុងការថ្លែងសន្ទរកថានៃការគោរពចំពោះសម្តេច។

ប្រធានាធិបតីប្រេស៊ីលលោក Luiz Inacio Lula da Silva បានសម្តែងការសោកស្ដាយជាខ្លាំងចំពោះការបាត់បង់សម្ដេចប៉ាប និងគោរការប្តេជ្ញាចិត្តរបស់ព្រះអង្គក្នុងការតស៊ូមតិសម្រាប់ "អ្នកគ្មានសិទ្ធិ ជនក្រីក្របំផុត និងការអំពាវនាវរបស់ទ្រង់សម្រាប់ការបញ្ចប់សង្គ្រាមនៅអ៊ុយក្រែន និងបជ្ឈិមបូព៌ា។

នៅប្រទេសប៉េរូ ប្រធានាធិបតីលោកស្រី Dina Boluarte បានប្រកាសការកាន់ទុក្ខទូទាំងប្រទេស ដើម្បីគោរពដល់កេរដំណែលរបស់សម្តេចប៉ាប។

អ្នកដើរតាមឱវាទរបស់សម្ដេចប៉ាប នៅអាហ្សង់ទីនបានប្រមូលផ្តុំគ្នាកាលពីថ្ងៃចន្ទ ២១ មេសាដើម្បីគោរពវិញ្ញាណក្ខន្ធសម្តេចប៉ាបនៅក្នុងព្រះវិហារ Buenos Aires ជាទីដែលសម្តេចសង្ឃធំធាត់ឡើង និងបានទទួលការអប់រំក្នុងជំនឿកាតូលិក។ក្រៅពីនេះក៏មានពិធីជួបជុំគោរពវិញ្ញាណក្ខន្ធជាច្រើនទៀតធ្វើឡើងនៅប្រទេសផ្សេងៗនៅទូទាំងពិភពលោកផងដែរ៕