សាកលវិទ្យាល័យ Harvard បាននិយាយកាលពីថ្ងៃចន្ទថា ខាងសកលវិទ្យាល័យបានដាក់ពាក្យបណ្តឹងសហព័ន្ធប្រឆាំងការបង្កកមូលនិធិរបស់រដ្ឋបាល លោក Trump ដោយចាត់ទុកចំណាត់ការនេះថា «ខុសច្បាប់ និងហួសពីសិទ្ធិអំណាចរបស់រដ្ឋាភិបាល»។ នៅក្នុងពាក្យបណ្ដឹងដែលដាក់នៅតុលាការតំបន់សហរដ្ឋអាមេរិក នៅរដ្ឋ Massachusetts សាកលវិទ្យាល័យបាននិយាយថាករណីនេះពាក់ព័ន្ធនឹង «កិច្ចខិតខំប្រឹងប្រែងរបស់រដ្ឋាភិបាលក្នុងការប្រើការផ្អាកមូលនិធិសហព័ន្ធជាការដាក់សម្ពាធដើម្បីជ្រៀតចូល គ្រប់គ្រងលើការសម្រេចចិត្តផ្នែកអប់រំនៅសាកលវិទ្យាល័យ Harvard»។

ប្រធានសាកលវិទ្យាល័យ Harvard លោក Alan M. Garber បានសរសេរក្នុងលិខិតមួយច្បាប់ទៅកាន់សមាជិកនៃសហគមន៍ Harvard ថា «ក្នុងរយៈពេលមួយសប្តាហ៍កន្លងទៅនេះ រដ្ឋាភិបាលសហព័ន្ធបានចាត់វិធានការមួយចំនួនបន្ទាប់ពីការបដិសេធរបស់សាកលវិទ្យា Harvard មិនអនុវត្តតាមការទាមទារដោយខុសច្បាប់»។ របាយការណ៍មួយរបស់កាសែត The New York Times បាននិយាយថា ពាក្យបណ្តឹង «បានបង្ហាញសញ្ញាពីការកើនឡើងយ៉ាងខ្លាំង» នៃការប្រឆាំងគ្នាដែលកំពុងបន្តរវាងថ្នាក់ឧត្តមសិក្សា និងលោក Trump។

យោងតាមរបាយការណ៍បានឱ្យដឹងថា រដ្ឋបាលបានដាក់យុទ្ធនាការរបស់ខ្លួនជាការប្រយុទ្ធប្រឆាំងក្រុមប្រឆាំងជនជាតិជ្វីហ្វ ប៉ុន្តែបានកំណត់គោលដៅលើកម្មវិធីជាច្រើន និងការបង្រៀនទាក់ទងនឹងភាពចម្រុះជាតិសាសន៍ និងបញ្ហាយេនឌ័រ ផងដែរ។

ចាប់តាំងពីចូលកាន់តំណែងក្នុងខែមករា រដ្ឋបាល លោក Trump បានចេញការព្រមានដល់សាកលវិទ្យាល័យឈានមុខជាច្រើននៅសហរដ្ឋអាមេរិក ដោយបញ្ជាក់ថា ពួកគេអាចប្រឈមនឹងការកាត់មូលនិធិ ប្រសិនបើពួកគេមិនកែសម្រួលគោលការណ៍របស់ខ្លួន។