អ្នកនាំពាក្យរបស់អង្គការសហប្រជាជាតិ កាលពីថ្ងៃចន្ទបានលើកឡើងពីការព្រួយបារម្ភអំពីការវាយប្រហារតាមអាកាសរបស់សហរដ្ឋអាមេរិកទៅលើកំពង់ផែប្រេងឥន្ធនៈ Ras Isa នៅប្រទេសយេម៉ែន ជាកន្លែងដែលបុគ្គលិកផ្តល់ជំនួយ៥នាក់ស្ថិតក្នុងចំណោមអ្នកស្លាប់និងរងរបួសរាប់រយនាក់។

លោក Stephane Dujarric អ្នកនាំពាក្យរបស់អគ្គលេខាធិការអង្គការសហប្រជាជាតិលោក Antonio Guterres ក៏បានសម្តែងការព្រួយបារម្ភអំពីការវាយប្រហាររបស់ក្រុមហ៊ួទីទៅលើអ៊ីស្រាអែល និងការដឹកជញ្ជូនទំនិញនៅសមុទ្រក្រហម។

លោក Dujarric បាននិយាយក្នុងអំឡុងសន្និសីទសារព័ត៌មានថា «យើងកត់សំគាល់ដោយក្តីបារម្ភចំពោះការវាយប្រហារតាមអាកាសធ្វើឡើងដោយសហរដ្ឋអាមេរិកទៅលើតំបន់ដែលគ្រប់គ្រងដោយក្រុមហ៊ួទី ក្នុងប្រទេសយេម៉ែន នៅក្នុងនិងជុំវិញកំពង់ផែ Ras Isa។

លោកបាននិយាយថា របាយការណ៍ដំបូងបានរាប់ចំនួនអ្នកស្លាប់និងរបួសជាង ២៣០ នាក់ ដោយក្នុងនោះមានអ្នកស្លាប់ ៨០ នាក់។ អគ្គិភ័យនៅកំពង់ផែត្រូវបានគេរាយការណ៍ថាបានពន្លត់កាលពីព្រឹកថ្ងៃចន្ទ ប៉ុន្តែទោះជាយ៉ាងណាក៏នៅតែមានការព្រួយបារម្ភយ៉ាងខ្លាំងចំពោះរបាយការណ៍នៃការលេចធ្លាយប្រេងចូលទៅក្នុងសមុទ្រក្រហម។

លោក Dujarric បាននិយាយថា «យើងក៏នៅតែមានការព្រួយបារម្ភយ៉ាងខ្លាំងអំពីការវាយប្រហារដោយមីស៊ីល និងយានដ្រូនដែលកំពុងបន្តធ្វើឡើងដោយក្រុមហ៊ួទីប្រឆាំងអ៊ីស្រាអែល និងនៅក្នុងសមុទ្រក្រហម ហើយអំពាវនាវឱ្យក្រុមហ៊ួទី បញ្ឈប់ការវាយប្រហារបែបនេះជាបន្ទាន់។