នៅថ្ងៃសុក្រ ទី២៥ ខែមេសា គឺជាខួប ១០ ឆ្នាំនៃគ្រោះរញ្ជួយដីកម្រិត ៧.៨ រិចទ័រ ដែលបានវាយប្រហារប្រទេសនេប៉ាល់ និងបានសម្លាប់មនុស្សរាប់ពាន់នាក់ ភាគច្រើននៃពួកគេរស់នៅតំបន់ជនបទកាត់ផ្តាច់ពីការថែទាំសុខភាពបន្ទាន់។

ការរញ្ជួយដីដ៏ធំលើកទីពីរបានវាយប្រហារនៅថ្ងៃទី១២ ខែឧសភា ភាគខាងកើតរដ្ឋធានី Kathmandu ខណៈប្រជាជននេប៉ាល់កំពុងចាប់ផ្តើមស្តារឡើងវិញពីការរញ្ជួយដីពីលើកមុន។

ការរញ្ជួយទាំងពីរលើ បានសម្លាប់មនុស្ស ៩.០០០នាក់ របួសជាង២២.០០០នាក់ និងធ្វើឲ្យខូចខាត ឬបំផ្លាញលំនៅឋានជាង ៩០០.០០០ខ្នង ដោយបង្ខំឱ្យមនុស្សជាច្រើនទប់ទល់នឹងសីតុណ្ហភាពត្រជាក់ខ្លាំងរស់នៅក្នុងទីជម្រកបណ្តោះអាសន្ន។

នៅពេលដែលការរញ្ជួយដីលើកទីពីរបានវាយប្រហារ អង្គការសហប្រជាជាតិរៃអង្គាសប្រាក់បានតែ១៣ ភាគរយនៃទឹកប្រាក់ចំនួន៤២៣លានដុល្លារ ដែលស្ថាប័ននេះបាននិយាយថាត្រូវការដើម្បីជួយប្រទេសនេប៉ាល់ឱ្យងើបឡើងវិញពីគ្រោះរញ្ជួយដី។ កំហឹង និងការខកចិត្ត បានកើតមានក្នុងប្រទេសនេប៉ាល់ក្នុងរយៈពេលប៉ុន្មានខែបន្ទាប់ពីគ្រោះមហន្តរាយ ខណៈប្រជាជននេប៉ាល់ជាច្រើនកំពុងរង់ចាំជំនួយ។

រដ្ឋាភិបាលបាននិយាយថា ប្រទេសនេប៉ាល់ ត្រូវការប្រាក់យ៉ាងហោចណាស់២ពាន់លានដុល្លារ ដើម្បីសាងសង់លំនៅឋាន មន្ទីរពេទ្យ ការិយាល័យរដ្ឋាភិបាល និងអគារប្រវត្តិសាស្ត្រ ហើយបានអំពាវនាវសុំជំនួយពីម្ចាស់ជំនួយអន្តរជាតិ។