អង្គការសហប្រជាជាតិ បានព្រមាននៅក្នុងរបាយការណ៍មួយកាលពីថ្ងៃចន្ទ (២១ មេសា) ថា ក្រុមឧក្រិដ្ឋកម្មអាស៊ី ដែលនៅពីក្រោយឧស្សាហកម្មឆបោកតាមអ៊ីនធឺណិតមានតម្លៃរាប់ពាន់លានដុល្លារ កំពុងពង្រីកខ្លួនពាសពេញពិភពលោក រួមទាំងទៅកាន់អាមេរិកខាងត្បូង និងអាហ្រ្វិក ខណៈការបង្រ្កាបនៅក្នុងតំបន់អាស៊ីអាគ្នេយ៍ មិនអាចទប់ស្កាត់សកម្មភាពរបស់ពួកគេបាន។

ការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម (UNODC) បាននិយាយថា បណ្តាញឧក្រិដ្ឋកម្ម ដែលបានផុសឡើងនៅក្នុងតំបន់អាស៊ីអាគ្នេយ៍ក្នុងប៉ុន្មានឆ្នាំចុងក្រោយនេះ បានបើកបរិវេណដ៏ធំទូលាយសម្រាប់ដាក់កម្មកររាប់ម៉ឺននាក់ ដែលត្រូវបានជួញដូរ និងបង្ខំឱ្យបោកប្រាស់ជនរងគ្រោះនៅជុំវិញពិភពលោក ហើយបានវិវត្តទៅជាឧស្សាហកម្មសកលដ៏ទំនើបមួយ។

ទីភ្នាក់ងារនេះនិយាយថា ទោះបីជារដ្ឋាភិបាលអាស៊ីអាគ្នេយ៍បានបង្កើនការបង្រ្កាបក៏ដោយ ក៏បណ្ដុំក្រុមឆបោកនោះបានពង្រីកនៅក្នុង និងក្រៅតំបន់ ហើយការប៉ាន់ប្រមាណបែបអភិរក្សបង្ហាញថា មានមណ្ឌលឆបោកទ្រង់ទ្រាយធំរាប់រយកន្លែងនៅជុំវិញពិភពលោក ដែលបង្កើតប្រាក់ចំណេញប្រចាំឆ្នាំរាប់សិបពាន់លានដុល្លារ។ UNODC បានអំពាវនាវឱ្យប្រទេសនានាធ្វើការរួមគ្នា និងបង្កើនកិច្ចប្រឹងប្រែងដើម្បីរំខានដល់ការផ្តល់ហិរញ្ញប្បទានរបស់ក្រុមឧក្រិដ្ឋកម្មនោះ។

បណ្ដាញឆបោកអនឡាញខុសច្បាប់នោះបានបង្កផលប៉ះពាល់ជាច្រើនទូទាំងសកលលោក ដោយអាមេរិក បានរាយការណ៍ពីការខាតបង់ច្រើនជាង ៥,៦ពាន់លានដុល្លារ ចំពោះការឆបោករូបិយបណ្ណគ្រីបតូ ក្នុងឆ្នាំ២០២៣ រួមទាំងច្រើនជាង ៤ពាន់លានដុល្លារ នៅក្នុងអ្វីដែលហៅថាការឆបោកបែបស្នេហា ដែលធ្វើឡើងដើម្បីជំរិតយកប្រាក់ពីមនុស្សវ័យចំណាស់ និងជនងាយរងគ្រោះជាញឹកញាប់៕