វិមានក្រឹមឡាំង បាននិយាយនៅថ្ងៃចន្ទ (២១ មេសា) ថា ជំហររបស់រដ្ឋបាលលោកប្រធានាធិបតីអាមេរិក Donald Trump លើការបដិសេធសមាជិកភាពសម្ព័ន្ធយោធាណាតូ សម្រាប់អ៊ុយក្រែន ជារឿងគួរឱ្យពេញចិត្តណាស់សម្រាប់ទីក្រុងមូស្គូ ប៉ុន្តែបានបដិសេធមិនធ្វើអត្ថាធិប្បាយលើក្តីសង្ឃឹមរបស់លោក Trump សម្រាប់កិច្ចព្រមព្រៀងសន្តិភាពក្នុងសប្តាហ៍នេះ។

ប្រេសិតសហរដ្ឋអាមេរិក លោក Keith Kellogg បានបញ្ជាក់ឡើងវិញកាលពីថ្ងៃអាទិត្យចុងសប្ដាហ៍មុនថា សមាជិកភាពរបស់អង្គការណាតូ សម្រាប់អ៊ុយក្រែន គឺ "មិននៅលើតុចរចាទេ" ខណៈលោក Trump និយាយថា ការបដិសេធរបស់អាមេរិកកន្លងមកលើរឿងនេះ ដោយសារតែសមាជិកភាពណាតូគឺជាមូលហេតុមួយនៃសង្គ្រាម ដោយនេះជាការផ្ដាច់ផ្លូវមួយទៀតឆ្ពោះទៅរកការធានាសន្តិសុខដែលទីក្រុងគីវ តែងតែចង់បាន។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា សមាជិកភាពអ៊ុយក្រែន នៃសម្ព័ន្ធយោធាដឹកនាំដោយសហរដ្ឋអាមេរិក នឹងក្លាយជាការគំរាមកំហែងដល់ផលប្រយោជន៍រុស្ស៊ី ហើយតាមពិត នេះជាមូលហេតុមួយនៃជម្លោះ"។

លោក Trump ដែលតែងតែលើកឡើងថាលោកអាចបង្កើតសន្តិភាពនៅអ៊ុយក្រែន បាននិយាយម្តងហើយម្តងទៀតថា លោកចង់បញ្ចប់ "ការបង្ហូរឈាម" នៃជម្លោះរយៈពេល ៣ឆ្នាំក្នុងប្រទេសអ៊ុយក្រែន ដែលរដ្ឋបាលរបស់លោកបានចាត់ទុកជាសង្រ្គាមតំណាងរវាងសហរដ្ឋអាមេរិក និងរុស្ស៊ី៕