បាតុករអ៊ីស្រាអែល រាប់សិបនាក់បានចេញធ្វើបាតុកម្មយ៉ាងខឹងសម្បារនៅតាមដងផ្លូវក្នុងទីក្រុង Tel Aviv និងបង្កឱ្យមានការប៉ះទង្គិចជាថ្មីម្ដងទៀតនៅល្ងាចថ្ងៃចន្ទ (២១ មេសា) ក្នុងការតវ៉ាប្រឆាំងនឹងរដ្ឋាភិបាលរបស់លោកនាយករដ្ឋមន្ត្រី Benjamin Netanyahu ដោយអំពាវនាវឱ្យលោកលាលែងពីតំណែង ជុំវិញសង្រ្គាមនៅតំបន់ហ្កាហ្សា និងការដោះលែងចំណាប់ថ្នូរ។

នគរបាលបានព្យាយាមរារាំងក្រុមបាតុករ និងបានហៅការហែក្បួនរបស់ពួកគេថាខុសច្បាប់ ខណៈបាតុកម្មបានចាកចេញពីទីតាំងតវ៉ាដែលបានកំណត់។ បាតុករខ្លះត្រូវបាននគរបាលបណ្តេញចេញដោយបង្ខំ ដោយសារពួកគេព្យាយាមកាន់កាប់ផ្លូវមួយនៅកណ្តាលទីក្រុង។ ក្រុមអ្នកតវ៉ាបានបដិសេធមិនព្រមចេញទេ ហើយការប៉ះទង្គិចមួយចំនួនបានកើតឡើងជាមួយនឹងកម្លាំងនគរបាល។

ការតវ៉ាបានក្លាយជាព្រឹត្តិការណ៍ប្រចាំសប្តាហ៍នៅក្នុងប្រទេសអ៊ីស្រាអែល ដែលធ្វើបាតុកម្មប្រឆាំងនឹងការសម្រេចចិត្តរបស់រដ្ឋាភិបាលក្នុងការបន្តការប្រយុទ្ធគ្នានៅតំបន់ហ្កាហ្សា និងអំពាវនាវឱ្យត្រឡប់ទៅតុចរចាវិញ ដើម្បីនាំយកចំណាប់ថ្នូរចំនួន ៥៩នាក់ដែលនៅសេសសល់ក្នុងដៃក្រុមសកម្មប្រយុទ្ធហាម៉ាស ត្រឡប់មកវិញ៕