តេក្វាន់ដូ៖ ខេមរសហព័ន្ធតេក្វាន់ដូ WT កាលពីចុងសប្ដាហ៍កន្លងទៅ បានបើកវគ្គបណ្តុះបណ្តាលអាជ្ញាកណ្តាល-ចៅក្រមថ្នាក់ជាតិឆ្នាំ២០២១ មុនចូលរួមកាត់សេចក្ដីក្នុងការប្រកួតកីឡាតេក្វាន់ដូ WT ជ្រើសរើសជើងឯកថ្នាក់ជាតិដែលគ្រោងនឹងប្រព្រឹត្តទៅចាប់ពីថ្ងៃទី១៦ ដល់ថ្ងៃទី១៩ ខែធ្នូខាងមុខនៅសាលាឯកជនមួយក្នុងរាជធានីភ្នំពេញ។
លោក គង់ សក្ខិដា អគ្គលេខាធិការរងសហព័ន្ធបានឲ្យដឹងថា វគ្គនេះមានសិក្ខាកាមចំនួន ២០នាក់ចូលរួមដែលជាអាជ្ញាកណ្តាល និងចៅក្រមមកពី ៤រាជធានី-ខេត្តរួមមានខេត្តបាត់ដំបង ខេត្តមណ្ឌលគីរី ខេត្តសៀបរាម និងភ្នំពេញ។ វគ្គនេះមានរយៈពេល ៤ថ្ងៃចាប់ពីថ្ងៃទី៥ ដល់ថ្ងៃទី៨ ខែធ្នូ ក្រោមការបង្រៀនរបស់គ្រូឧទ្ទេស ៤រូបក្នុងនោះក៏មានគ្រូឧទ្ទេសជនជាតិកូរ៉េខាងត្បូងលោក Cheon Samyeong ផងដែរ។ លោកបន្ដថា វគ្គបណ្តុះបណ្តាលដែលទទួលបានការគាំទ្រថវិកាពីក្រសួងអប់រំ យុវជន និងកីឡា គឺជាផ្នែកមួយដ៏សំខាន់ក្នុងការជួយពន្លឿនខេមរសហព័ន្ធតេក្វាន់ដូ WT ដើម្បីធ្វើការបណ្តុះបណ្តាលធនធានមនុស្សដូចជាមន្ត្រីបច្ចេកទេស អាជ្ញាកណ្ដាល-ចៅក្រម និងគ្រូបង្វឹកតេក្វាន់ដូថ្នាក់មូលដ្ឋានថ្នាក់ជាតិ និងថ្នាក់អន្តរជាតិជាដើម សម្រាប់ដំណើរឆ្ពោះទៅធ្វើម្ចាស់ផ្ទះការប្រកួតកីឡាស៊ីហ្គេមឆ្នាំ២០២៣ នៅកម្ពុជា ក៏ដូចជាការត្រៀមការប្រកួតអន្ដរជាតិផ្សេងៗ។
ដូច្នេះសហព័ន្ធរំពឹងថា សិក្ខាកាមចូលរួមវគ្គបណ្ដុះបណ្ដាលនេះនឹងទទួលបានចំណេះដឹងថ្មីៗ សម្រាប់អភិវឌ្ឍសមត្ថភាពខ្លួនឲ្យកាន់តែប្រសើរ ដើម្បីត្រៀមការប្រកួតជើងឯកថ្នាក់ជាតិនាពេលឆាប់ៗខាងមុខ ក៏ដូចជាអភិវឌ្ឍន៍សមត្ថភាពឈានទៅមានលទ្ធភាពចូលរួមកាត់សេចក្ដី ក្នុងការប្រកួតអន្ដរជាតិនាថ្ងៃអនាគតផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
