ប្រធានាធិបតីម៉ិកស៊ិក លោកស្រី ក្លៅឌៀ សេនបោម(Claudia Sheinbaum) បាននិយាយកាលពីថ្ងៃច័ន្ទថា លោកស្រី អាចបង្ហាញសមភាគីអាមេរិក លោក Donald Trump ជាមួយនឹងទឡ្ហីករណ៍ប្រឆាំងការដំឡើងពន្ធលើដែកថែប អាលុយមីញ៉ូម និងរថយន្តនៅក្នុងការសន្ទនាតាមទូរស័ព្ទ កាលពីសប្តាហ៍មុន ទោះបីជាមិនបានឈានដល់កិច្ចព្រមព្រៀងក៏ដោយ។

លោកស្រី Sheinbaum បាននិយាយនៅក្នុងសន្និសីទសារព័ត៌មាននៅវិមានជាតិថា «យើងកំពុងពិភាក្សាអំពីបញ្ហាដំឡើងពន្ធលើដែកថែប អាលុយមីញ៉ូម និងផលិតផលរថយន្ត។ យើងពុំបានឈានដល់កិច្ចព្រមព្រៀងណាមួយទេ ប៉ុន្តែយើងកំពុងបង្ហាញទឡ្ហីករណ៍» ដើម្បីការពារពន្ធនាំចូលមិនឱ្យចូលជាធរមាន។

លោកស្រីបានពន្យល់ថា «ក្នុងករណីដែកថែប និងអាលុយមីញ៉ូម យើងកំពុងជជែកវែកញែកថា យើងមានឱនភាព ដែលសហរដ្ឋអាមេរិក នាំចេញដែកថែប និងអាលុយមីញ៉ូមចូលទៅម៉ិកស៊ិកច្រើនជាងការនាំចេញរបស់ម៉ិកស៊ិកចូលទៅសហរដ្ឋអាមេរិក»។

លោកស្រី បាននិយាយថា ម៉ិកស៊ិកមានច្រកពីរដើម្បីដោះស្រាយការដំឡើងពន្ធ៖ កិច្ចព្រមព្រៀងសហរដ្ឋអាមេរិក-ម៉ិកស៊ិក-កាណាដា ស្តីពីពាណិជ្ជកម្មសេរី និងច្បាប់របស់អង្គការពាណិជ្ជកម្មពិភពលោកទាក់ទងនឹង «ប្រទេសដែលគាំទ្របំផុត» ក្នុងគោលបំណងធានាឱ្យមានការអនុវត្តស្មើភាពគ្នាក្នុងបញ្ហាពាណិជ្ជកម្ម»។