សម្តេច ប៉ាប ហ្វ្រង់ស៊ីស បានសោយទិវង្គត ដោយសារជំងឺដាច់សរសៃឈាមខួរក្បាល។ នេះបើតាមបុរីវ៉ាទីកង់ ដែលបានប្រកាសប៉ុន្មានម៉ោងបន្ទាប់ពីការចូលទិវង្គត កាលថ្ងៃចន្ទ (ទី២១ ខែមេសា) របស់បុគ្គលកំណែទម្រង់ព្រះជន្ម ៨៨វស្សា ដែលបានជួយបំផុសគំនិតឲ្យមានការលះបង់ ប៉ុន្តែបានធ្វើឲ្យអ្នកងប់ងុលនឹងទំនៀមទម្លាប់ប្រពៃណីខឹងសម្បា អំឡុងរយៈពេល ១២ឆ្នាំដែលព្រះអង្គដឹកនាំវិហារកាតូលិក។

សម្ដេចសង្ឃកាតូលិកសញ្ជាតិអាហ្សង់ទីន បានឃា្លតគ្មានថ្ងៃត្រលប់នៅឯនិវេសនដ្ឋាន Santa Marta របស់ព្រះអង្គ ក្នុងបុរីវ៉ាទីកង់ ដែលមានរយៈស្ទើរតែជិតមួយខែបន្ទាប់ពីបានយាងចាកចេញពីមន្ទីរពេទ្យ ក្រោយសម្រាកព្រះកាយរយៈពេល ៥សប្តាហ៍ ដើម្បីព្យាបាលជំងឺរលាកសួតទាំងសងខាង។

មួយថ្ងៃបន្ទាប់ពីព្រះអង្គបានស្វាគមន៍ហ្វូងមនុស្ស ក្នុងថ្ងៃបុណ្យ Easter នៅទីលាន St Peter’s Square អ្នកកាន់ទុក្ខបានជួបជុំគ្នា នៅទីធ្លាសាធារណៈ ដែលភាគច្រើនមានទឹកភ្នែករលីងរលោង ដើម្បីគោរពព្រះវិញ្ញាណក្ខន្ធរបស់ព្រះអង្គ។

យោងតាមវិញ្ញាបនបត្រការសោយទិវង្គតរបស់ព្រះអង្គ ដែលចេញដោយបុរីវ៉ាទីកង់ សម្តេច ប៉ាប ហ្វ្រង់ស៊ីស បានសោយទិវង្គត ដោយសារជំងឺដាច់សរសៃឈាមខួរក្បាល ដែលបណ្តាលឲ្យសន្លប់ ហើយខ្សោយបេះដូង «ដែលមិនអាចជួយសង្គ្រោះបាន»។

បណ្ដាមេដឹកនាំទូទាំងពិភពលោក ចាប់ពីប្រធានាធិបតីអាមេរិក លោក Donald Trump រហូតដល់មេដឹកនាំរុស្ស៊ី លោក Vladimir Putin បានគោរពវិញ្ញាណក្ខន្ធនៃមេដឹកនាំប្រកបដោយសីលធម៌ និងស្មារតីអង្គនេះ។ ហើយការអធិដ្ឋានត្រូវបានធ្វើឡើងនៅជុំវិញពិភពលោក៕