ក្រុមហ៊ុនរដ្ឋរុស្ស៊ីដែលដឹកនាំគម្រោង បានប្រាប់សារព័ត៌មាន Reuters ថា ផែនការសាងសង់រោងចក្រថាមពលនុយក្លេអ៊ែរ នឹងបន្តមាននៅសហភាពមីយ៉ាន់ម៉ា ជាប្រទេសអាស៊ីអាគ្នេយ៍ដែលហែកហួរដោយសង្រ្គាម និងដែលមួយផ្នែកត្រូវបានបំផ្លិចបំផ្លាញដោយរញ្ជួយដីដ៏ធំ កាលពីខែមីនា។

គួរបញ្ជាក់ថា មេដឹកនាំរបបយោធាមីយ៉ាន់ម៉ា លោក Min Aung Hlaing និងប្រធានាធិបតីរុស្ស៊ី លោក Vladimir Putin កាលពីខែមុន បានចុះហត្ថលេខាលើកិច្ចព្រមព្រៀង ដើម្បីសង់រោងចក្រនុយក្លេអ៊ែរខ្នាតតូចមួយ ដែលមានរយៈពេល ៣សប្តាហ៍មុនពេលគ្រោះរញ្ជួយដីកម្រិត ៧,៧រ៉ិចទ័រ បានបំផ្លិចបំផ្លាញសហគមន៍ និងបានឆក់យកជីវិតមនុស្សជាង ៣.៧០០នាក់ ដែលជាគ្រោះមហន្តរាយធម្មជាតិដ៏អាក្រក់បំផុតរបស់ប្រទេសនេះជាលើកដំបូង ក្នុងរយៈពេលជាច្រើនទសវត្សរ៍មកនេះ។

កិច្ចព្រមព្រៀងនេះ មានពាក់ព័ន្ធនឹងកិច្ចសហប្រតិបត្តិការកសាងរ៉េអាក់ទ័រម៉ូឌុលខ្នាតតូច (SMR) នៅសហភាពមីយ៉ាន់ម៉ា ដោយសមត្ថភាពផលិតអគ្គិសនីដំបូង ១១០មេហ្កាវ៉ាត់ ដែលមានម៉ាស៊ីនរ៉េអាក់ទ័រ ៥៥មេហ្គាវ៉ាត់ចំនួន២ ផលិតដោយក្រុមហ៊ុននុយក្លេអ៊ែររដ្ឋ Rosatom របស់រុស្ស៊ី។

ការិយាល័យសារព័ត៌មានរបស់ក្រុមហ៊ុននេះ បានឲ្យដឹងតាមរយៈអ៊ីម៉ែលថា៖ «គ្រោះរញ្ជួយដី នាពេលថ្មីៗនេះ មិនបានប៉ះពាល់ដល់ផែនការរបស់ក្រុមហ៊ុន Rosatom នៅប្រទេសមីយ៉ាន់ម៉ានោះទេ។ ក្រុមហ៊ុន Rosatom ប្រកាន់ខ្ជាប់នូវស្តង់ដារសុវត្ថិភាព និងភាពជឿជាក់អន្តរជាតិខ្ពស់បំផុត ក្នុងនោះរួមទាំងតម្រូវការធន់នឹងរញ្ជួយដីយ៉ាងខ្លាំងក្លាផងដែរ»។

យ៉ាងណាក្ដី ក្រុមហ៊ុន Rosatom បានបដិសេធមិនផ្តល់ពីពេលវេលាសាងសង់ ឬព័ត៌មានលម្អិត អំពីការស្នើឡើងនូវទីតាំងនៃរោងចក្រនុយក្លេអ៊ែរ ដែលនឹងត្រូវបានដំណើរការដោយម៉ាស៊ីនរ៉េអាក់ទ័រ RITM-200N ផលិតដោយក្រុមហ៊ុន សម្រាប់ប្រើប្រាស់ដំបូង នៅលើនាវាបំបែកផ្ទាងទឹកកក៕