ប៉ាគីស្ថាននឹងត្រូវលើកឡើងពីវិបត្តិកង្វក់បរិយាកាសដែលបង្កឲ្យមានក្តីបារម្ភពីគ្រាអាសន្នសុខភាពទូទាំងប្រទេស ពិសេសបញ្ហាប៉ះពាល់ដល់សុខភាពផ្លូវចិត្ត និងរាងកាយកុមារ ។

អង្គការសហប្រជាជាតិ(UN) បានប៉ាន់ស្មានថា នៅក្នុងខេត្ត Punjab ដែលជាខេត្តមានមនុស្សរស់នៅច្រើនបំផុតរបស់ប៉ាគីស្ថាន កុមារជាង ១១លាននាក់ក្រោមអាយុ ៥ឆ្នាំ រងប៉ះពាល់ដោយសារកង្វក់បរិយាកាសជារៀងរាល់ថ្ងៃ ។

និទស្សន៍តាមដានគុណភាពខ្យល់ IQAir របស់ស្វីស បានចាត់ថ្នាក់ទីក្រុង Lahore រដ្ឋធានីខេត្ត Punjab ស្ថិតក្នុងចំណោមទីក្រុងកំពូលៗចំនួន ៣របស់ពិភពលោកមានកង្វក់បរិយាកាសខ្លាំងជាងគេបំផុត ពេលដែលសន្ទស្សន៍គុណភាពខ្យល់ឡើងផុតកម្រិត ១០០ ដែលជាកម្រិតគ្មានសុខភាព ។

បន្ថែមពីលើកម្រិតដ៏គ្រោះថ្នាក់នេះ ភាគល្អិតកង្វក់បរិយាកាសបង្កគ្រោះថ្នាក់ដល់សុខភាព ត្រូវបានរកឃើញញឹកញាប់ថាលើសពីគុណភាពខ្យល់ ១៥មីក្រូក្រាមក្នុង ១ម៉ែត្រគូបខ្យល់រយៈពេល ២៤ម៉ោងរបស់អង្គការសុខភាពពិភពលោក(WHO) ។

អង្គការ WHO បានចាត់ទុកកង្វក់បរិយាកាសនេះថា គ្រោះថ្នាក់ខ្លាំងបំផុតដល់សុខភាពកុមារ ។ សិស្សសាលាទីក្រុង Lahore បានត្អូញត្អែរថា កង្វក់បរិយាកាសបានធ្វើឲ្យភ្នែករបស់ពួកគេក្រហាយក្រហល់ខ្លាំង ៕