ភាគហ៊ុន និងប្រាកដុល្លារសហរដ្ឋអាមេរិក បានដាំក្បាលចុះជាថ្មីម្តងទៀត ពេលដែលលោកប្រធានាធិបតី Donald Trump បង្កើនការវាយប្រហាររបស់លោកលើទេសាភិបាលធនាគារកណ្តាលសហរដ្ឋអាមេរិក ដោយបានចាត់ទុកលោកថាជា “អ្នកចាញ់ដ៏ធំម្នាក់”សម្រាប់ការមិនបន្ទាបអត្រាការប្រាក់ ។

នៅក្នុងការបង្ហោះសារលើបណ្តាញព័ត៌មានសង្គម លោក Trump បានអំពាវនាវឲ្យទេសាភិបាលធនាគារកណ្តាលអាមេរិកលោក Jerome Powell កាត់បន្ថយអត្រាការប្រាក់ “មុនមានរឿងអាក្រក់កើតឡើង” ដើម្បីជួយជំរុញសេដ្ឋកិច្ច ដោយលោកនិយាយថា លោក Powell មានការយឺតយ៉ាវខ្លាំងក្នុងការឆ្លើយតបចំពោះការអភិវឌ្ឍសេដ្ឋកិច្ច ។

លោក Trump បាននិយាយថា ជាមួយនឹងការចំណាយមាននិន្នាការធ្លាក់ចុះខ្លាំង នោះស្ទើរតែមិនមានអតិផរណាទេ ប៉ុន្តែអាចមានការយឺតយ៉ាវនៃសេដ្ឋកិច្ច លុះត្រាតែប្រមុខធនាគារកណ្ដាលអាមេរិករូបនេះ កាត់បន្ថយអត្រាការប្រាក់ឥឡូវនេះ ។

កំណើនសម្ពាធពីរដ្ឋបាលអាមេរិកលើលោក Powell និងបំណងរបស់លោក Trump ដែលចង់ឲ្យប្រធានធនាគារកណ្ដាលរូបនេះចុះពីតំណែង បានធ្វើឱ្យទីផ្សារភាគហ៊ុនធ្លាក់ចុះ និងការសម្រុកលក់បណ្ណបំណុលកាន់តែខ្ពស់ ខណៈវិនិយោគិន និងក្រុមអ្នកវិភាគភ័យខ្លាចភាពរង្គោះរង្គើ ប្រសិនបើលោក Trump បញ្ឆេះជម្លោះ ជុំវិញឯករាជ្យភាពនៃគោលនយោបាយរូបិយវត្ថុរបស់ធនាគារកណ្ដាលអាមេរិក ហើយព្យាយាមដកលោក Powell មុនពេលចុងបញ្ចប់នៃអាណត្តិរបស់លោកក្នុងពេលជាង ១ឆ្នាំខាងមុខ ។

ផ្សារភាគហ៊ុន S&P 500 បានធ្លាក់ចុះប្រហែល ២,៤ភាគរយកាលពីថ្ងៃចន្ទ ។ ពួកគេបានធ្លាក់ចុះប្រហែល ១២ភាគរយ ចាប់តាំងពីដើមឆ្នាំនេះ ។

ដោយឡែក ផ្សារភាគហ៊ុន Dow Jones Industrial Average បានធ្លាក់ចុះ ២,៤ភាគរយ និងបានធ្លាក់ចុះប្រហែល ១០ភាគរយ មកទល់នឹងពេលនេះ ក្នុងឆ្នាំនេះ ខណៈផ្សារភាគហ៊ុន Nasdaq បានធ្លាក់ចុះ ប្រហែល ២,៥ភាគរយ និងបានធ្លាក់ចុះប្រហែល ១៨ភាគរយ ចាប់តាំងពីខែមករារហូតមក ៕