ក្រសួងសុខាភិបាលហ្កាហ្សា បានធ្វើការព្រមានថា ការបន្តបិទច្រកសម្រាប់ការផ្គត់ផ្គង់វេជ្ជសាស្រ្តរបស់អ៊ីស្រាអែល បានការពារមិនឲ្យចូលវ៉ាក់សាំងបង្ការជំងឺស្វិតដៃជើង ធ្វើឲ្យកុមារជាងកន្លះលានប្រឈមហានិភ័យខ្ពស់ ។

ពួកគេនិយាយនៅក្នុងសេចក្តីថ្លែងការណ៍ថា ការបិទផ្លូវនេះ បានបញ្ឈប់ការអនុវត្តន៍ដំណាក់កាលទី ៤នៃយុទ្ធនាការបង្ការជំងឺស្វិតដៃជើងរបស់ក្រសួងសុខាភិបាលហ្កាហ្សា ធ្វើឲ្យកុមារ ៦០២.០០០នាក់ ងាយរងគ្រោះកើតមានស្ថានភាពស្វិតដៃជើងអចិន្រ្តៃយ៍ និងមានពិការភាពរ៉ាំរ៉ៃ ។ ក្រុមមន្រ្តីនិយាយថា ផលវិបាកសុខភាព នឹងគ្រោះថ្នាក់ខ្លាំង ។

ក្រសួងសុខាភិបាលហ្កាហ្សា និយាយទៀតថា កុមារនៅតំបន់ហ្កាហ្សា ប្រឈមហានិភ័យផលវិបាកសុខភាពធ្ងន់ធ្ងរ និងមិនធ្លាប់មានពីមុនមក ដោយសារកង្វះអាហារូបត្ថម្ភគ្រប់គ្រាន់ និងទឹកផឹក ។

ការបិទច្រករបស់អ៊ីស្រាអែល ធ្វើឲ្យលែងមានលំហូរចូលជំនួយវេជ្ជសាស្រ្ត ទៅក្នុងដែនដីឡោមព័ទ្ធមួយនេះ ចាប់តាំងពីដើមខែមីនារហូតមក ក្នុងនោះអង្គការសហប្រជាជាតិ(UN) បានព្រមានពីការដួលរលំស្ថានភាពមនុស្សធម៌ធ្ងន់ធ្ងរ ។

ក្រសួងមួយនេះ បន្តថា ជនប៉ាឡេស្ទីនយ៉ាងហោច ២៦នាក់ ត្រូវបានសម្លាប់ និងមនុស្ស ៦០នាក់ផ្សេងទៀត បានរងរបួសនៅក្នុងការវាយប្រហាររបស់អ៊ីស្រាអែលនៅទូទាំងតំបន់ហ្កាហ្សា ក្នុងរយៈពេល ២៤ម៉ោងចុងក្រោយនេះ ៕