ទីក្រុងប៉េកាំង បានប្រាប់ឲ្យដឹងថា ខ្លួនរំពឹងថា នឹងមានកិច្ចពិភាក្សា «ស៊ីជម្រៅ» ជាមួយរដ្ឋមន្ត្រីការបរទេសអ៊ីរ៉ង់ លោក Abbas Araghchi អំឡុងដំណើរទស្សនកិច្ចរបស់លោក នៅប្រទេសចិន ក្នុងសប្តាហ៍នេះ ដោយបន្ថែមថា ប្រទេសទាំង២ នឹងធ្វើការលើ «ការបង្កើនទំនុកចិត្តដល់គ្នាទៅវិញទៅមកផ្នែកនយោបាយ»។

អ្នកនាំពាក្យក្រសួងការបរទេស លោក Guo Jiakun នាថ្ងៃអង្គារ (ទី២២ ខែមេសា) នេះ បាននិយាយថា៖ «ភាគីទាំង២ នឹងមានការផ្លាស់ប្តូរស៊ីជម្រៅ លើទំនាក់ទំនងទ្វេភាគីចិន-អ៊ីរ៉ង់ ក៏ដូចជាចែករំលែកក្ដីបារម្ភ អំពីបញ្ហាអន្តរជាតិ និងតំបន់»។

គួរបញ្ជាក់ថា ដំណើរទស្សនកិច្ចទៅកាន់ប្រទេសចិនរបស់អ្នកការទូតជាន់ខ្ពស់របស់ក្រុងតេអេរ៉ង់ បានមានឡើង នៅមុនការចរចានុយក្លេអ៊ែរជុំទី៣ រវាងអ៊ីរ៉ង់ និងសហរដ្ឋអាមេរិក។

លោក Araghchi ធ្លាប់បានទៅបំពេញទស្សនកិច្ចនៅប្រទេសចិន កាលពីខែធ្នូ។ ទីក្រុងប៉េកាំង គឺជាហត្ថលេខីនៃកិច្ចព្រមព្រៀងឆ្នាំ២០១៥ ដែលត្រូវបានបោះបង់ចោល ពោលគឺជាកតិកាសញ្ញាដែលបានគ្រប់គ្រងកម្មវិធីនុយក្លេអ៊ែររបស់ទីក្រុងតេអេរ៉ង់។

ជាមួយគ្នានេះ ប្រទេសចិនគឺជាដៃគូពាណិជ្ជកម្មដ៏ធំបំផុតរបស់អ៊ីរ៉ង់ និងជាអ្នកទិញប្រេងដ៏សំខាន់របស់ប្រទេសនេះ ខណៈដែលទីក្រុងតេអេរ៉ង់នៅតែស្ថិតនៅក្រោមការដាក់ទណ្ឌកម្មរបស់សហរដ្ឋអាមេរិក៕