នៅថ្ងៃអង្គារនេះ របបសឹកមីយ៉ាន់ម៉ា បានពន្យាពេលបទឈប់បាញ់ដែលត្រូវបានប្រកាសក្រោយការរញ្ជួយដីកាលពីខែមុន រហូតដល់ថ្ងៃទី ៣០ ខែមេសា ក្រោយពេលក្រុមជំនួយ និងក្រុមសម្របសម្រួលអន្តរជាតិអំពាវនាវឲ្យបន្តបទឈប់បាញ់ ដើម្បីបន្ធូរបន្ថយដល់កិច្ចខិតខំជួយសង្រ្គោះ ។

របបសឹកដែលបានរឹបអូសអំណាចក្នុងរដ្ឋប្រហារឆ្នាំ ២០២១បង្កឲ្យកើតមានសង្រ្គាមស៊ីវិលរបស់ភាគីជាច្រើននោះ និយាយថា ពួកគេនឹងបន្ធូរបន្ថយការវាយប្រហារលើគូប្រជែងប្រដាប់អាវុធរបស់ខ្លួន បន្ទាប់ពីការរញ្ជួយដីកម្រិត ៧,៧រ៉ិចទ័រសម្លាប់មនុស្សជាង ៣.៧០០នាក់ ។

ក្រុមអ្នកតាមដានជម្លោះ និងក្រុមអ្នកសុ្រកនៅតំបន់ជម្លោះ និយាយថា ការប្រយុទ្ធគ្នានៅតែបន្តពីភាគីទាំង ២ អំឡុងបទឈប់បាញ់រយៈពេល ២០ថ្ងៃ ដែលត្រូវបានប្រកាសឡើងដើម្បីចែកចាយជំនួយនៅតំបន់ភាគកណ្តាលមីយ៉ាន់ម៉ា ហើយបទឈប់បាញ់នេះ នឹងត្រូវផុតកំណត់នៅវេលាម៉ោង ៥ និង ៣០នាទីល្ងាច ម៉ោងសកលថ្ងៃអង្គារនេះ ។

ក្រុមព័ត៌មានរបបសឹកសហភាពមីយ៉ាន់ម៉ា និយាយនៅក្នុងសេចក្តីថ្លែងការណ៍ថា បទឈប់បាញ់ដែលបន្តរហូតដល់ថ្ងៃទី ៣០ ខែមេសានេះ មានគោលដៅបន្តដំណើរការកសាង និងស្តាឡើងវិញ ។

ប៉ុន្តែយោធា និយាយថា ពួកគេនឹងមិនស្ទាក់ស្ទើសងសឹកនោះឡើយ បើសិនជាក្រុមប្រដាប់អាវុធណាមួយបើកការវាយប្រហារនោះ ស្របពេលដែលពួកគេប្រកាសបទឈប់បាញ់ ។

គួររំឭកថា ការរញ្ជួយដីកាលពីថ្ងៃទី ២៨ ខែមីនា បណ្តាលឲ្យមនុស្សជាង ៦ម៉ឺននាក់ រស់នៅក្នុងជំរំសំពត់តង់ ហើយនិងជំរុញឲ្យមនុស្ស ២លាននាក់ ត្រូវការជំនួយសំខាន់ៗ និងការការពារ ៕