ទីភ្នាក់ងារសារព័ត៌មាន Kyodo របស់ជប៉ុន នៅថ្ងៃអង្គារ (ទី២២ ខែមេសា) នេះ បានរាយការណ៍ថា នាយករដ្ឋមន្ត្រីចិន លោក Li Qiang បានផ្ញើលិខិតទៅកាន់នាយករដ្ឋមន្ត្រីជប៉ុន លោក Shigeru Ishiba ដោយអំពាវនាវឲ្យមានការឆ្លើយតបស្របគ្នា ចំពោះវិធានការពន្ធគយរបស់ប្រធានាធិបតីអាមេរិកលោក Donald Trump។

ដោយដកស្រង់សម្តីមន្ត្រីរដ្ឋាភិបាលជប៉ុនជាច្រើនរូប សារព័ត៌មាន Kyodo បានឲ្យដឹងថា លិខិតដែលបានផ្ញើតាមរយៈស្ថានទូតចិន ប្រចាំនៅប្រទេសជប៉ុន បានសង្កត់ធ្ងន់លើតម្រូវការ ក្នុងការ «រួមគ្នាប្រយុទ្ធប្រឆាំងនឹងវិធានការគាំពារនិយម»។

ពាក់ព័ន្ធនឹងសេចក្ដីរាយការណ៍នេះ ក្រសួងការបរទេសនៃប្រទេសទាំង២ មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។

កាលពីថ្ងៃចន្ទ ទីក្រុងប៉េកាំងបានព្រមានប្រទេសនានា ក្នុងការឈានដល់កិច្ចព្រមព្រៀងសេដ្ឋកិច្ចទូលំទូលាយជាមួយសហរដ្ឋអាមេរិកដោយយកប្រៀបលើខ្លួន ជាការប្រើប្រាស់នូវវោហាសាស្ត្រធ្ងន់ៗរបស់ខ្លួន នៅក្នុងសង្គ្រាមពាណិជ្ជកម្មដែលកំពុងតែឡើងកម្ដៅ រវាងប្រទេសដែលមានសេដ្ឋកិច្ចធំជាងគេបំផុតទាំង២៕