បព្វជិតរ៉ូម៉ាំងកាតូលិករបស់បុរីវ៉ាទីកង់ បានសម្រេចចិត្តនៅថ្ងៃអង្គារ (២២ មេសា) ថា ព្រះសពរបស់សម្តេចប៉ាប ហ្វ្រង់ស៊ីស នឹងត្រូវដាក់តម្កល់សម្រាប់ឱ្យសាធារណៈជនចូលទៅគោរព ហើយរាជពិធីបុណ្យសពនឹងប្រព្រឹត្តឡើងនៅថ្ងៃសៅរ៍ ២៦ មេសា ខាងមុខនេះ នៅទីលានចតុរង្គ សេន ភីតធើ (St. Peter's) ដោយនោះនឹងក្លាយជាពិធីដ៏ឧឡារិកបំផុត ដែលនឹងទាក់ទាញបណ្ដាមេដឹកនាំមកពីជុំវិញពិភពលោក។

សម្តេចប៉ាប ហ្វ្រង់ស៊ីស ក្នុងព្រះជន្មាយុ ៨៨ព្រះវស្សា បានសោយទិវង្គតកាលពីថ្ងៃចន្ទសប្ដាហ៍នេះ បន្ទាប់ពីប្រឈួនខ្លាំងដោយរោគដាច់សរសៃឈាមខួរក្បាល និងគាំងបេះដូង ដោយបញ្ចប់រជ្ជកាលដ៏ច្របូកច្របល់របស់ទ្រង់។

បុរីវ៉ាទីកង់ បានចេញផ្សាយរូបព្រះឆាយាល័ក្ខណ៍របស់សម្តេចប៉ាប ហ្វ្រង់ស៊ីស ដោយគ្រងព្រះពស្រ្ត ហើយក្នុងព្រះហស្ថមានផ្កា តម្កល់ក្នុងព្រះមឈូសាបើកចំហមួយដាក់ក្នុងវិហារ Santa Marta ជាទីដែលទ្រង់គង់នៅកំឡុងពេលរាជ្យជាសម្តេចប៉ាបរយៈពេល ១២ព្រះវស្សាមកនេះ។

ព្រះសពរបស់ទ្រង់នឹងត្រូវយាងទៅដាក់ក្នុងទីបញ្ចុះសពនៃវិហារ St. Peter នៅព្រឹកថ្ងៃពុធនេះ ហើយនឹងត្រូវតម្កល់សម្រាប់ឱ្យសាធារណៈជនចូលគោរពនៅទីនោះរហូតដល់ល្ងាចថ្ងៃសុក្រវេលាម៉ោង ៧:០០យប់ (ម៉ោងក្នុងស្រុក)។ រាជពិធីបុណ្យសពរបស់ទ្រង់នឹងប្រព្រឹត្តឡើងនៅវេលាម៉ោង ១០:០០ព្រឹកនៅថ្ងៃសៅរ៍ នៅទីលានចតុរង្គ St. Peter's ទល់មុខទីបញ្ចុះសពសតវត្សទី១៦ មួយនោះ ហើយនឹងត្រូវអធិបតីដោយបព្វជិត និងសម្ដេចសង្ឃជាន់ខ្ពស់ជាច្រើនអង្គ៕