ប្រធានាធិបតីអ៊ុយក្រែន លោក Volodymyr Zelenskiy បានលើកឡើងកាលពីថ្ងៃអង្គារ (២២ មេសា) ថា ទីក្រុងគីវ ត្រៀមខ្លួនរួចរាល់ហើយសម្រាប់កិច្ចពិភាក្សាជាមួយរុស្ស៊ី "ក្នុងទម្រង់បែបណាក៏ដោយ" ឱ្យតែមានបទឈប់បាញ់មួយអាចសម្រេចបាន ខណៈសារព័ត៌មាន Financial Times បានរាយការណថា លោកប្រធានាធិបតីរុស្ស៊ី Vladimir Putin បានបង្ហើបថាលោកយល់ព្រមផ្តល់សម្បទានដោយការបញ្ឈប់ប្រតិបត្តិការយោធារបស់រុស្ស៊ី នៅក្នុងសមរភូមិជួរមុខបច្ចុប្បន្ន។

ភាគីជម្លោះទាំងពីរកំពុងព្យាយាមបង្ហាញពីវឌ្ឍនភាពឆ្ពោះទៅរកការបញ្ចប់សង្គ្រាមរបស់រុស្ស៊ី នៅអ៊ុយក្រែន ដែលពេលនេះឈានចូលឆ្នាំទី៤ហើយ បន្ទាប់ពីប្រធានាធិបតីអាមេរិក លោក Donald Trump បានគំរាមថា លោកនឹងដើរចេញពីកិច្ចប្រឹងប្រែងបង្កើតសន្តិភាពនេះ ប្រសិនបើគ្មានវឌ្ឍនភាព។

លោក Zelenskiy បានប្រាប់អ្នកយកព័ត៌មាននៅក្នុងការិយាល័យប្រធានាធិបតីនៅទីក្រុងគីវថា "អ៊ុយក្រែន ត្រៀមខ្លួនធ្វើគ្រប់យ៉ាងបន្ទាប់ពីមានបទឈប់បាញ់មួយ ហើយអ៊ុយក្រែនក៏ត្រៀមខ្លួនជាស្រេចដើម្បីចរចាក្នុងទម្រង់បែបណាក៏ដោយ ដើម្បីកុំឱ្យមានការកាប់សម្លាប់មន្តទៀត"។ លោកសង្កត់ធ្ងន់ថា ការពិភាក្សាណាមួយទាក់ទងនឹងលក្ខខណ្ឌនៃកិច្ចព្រមព្រៀងសន្តិភាព គួរតែកើតឡើងនៅពេលការប្រយុទ្ធគ្នាបានបញ្ឈប់ ហើយការឯកភាពលើរឿងគ្រប់យ៉ាងមិនអាចកើតឡើងឆាប់ពេកនោះទេ។

ប្រធានាធិបតីអ៊ុយក្រែនរូបនេះបញ្ជាក់ថា គណៈប្រតិភូរបស់លោកនឹងទៅពិភាក្សាពីបទឈប់បាញ់ពេញលេញមួយ ឬដោយផ្នែក នៅក្នុងកិច្ចពិភាក្សាជាមួយមន្ត្រីអឺរ៉ុប និងសហរដ្ឋអាមេរិក នៅទីក្រុងឡុងដ្រ៍ ក្នុងថ្ងៃពុធសប្ដាហ៍នេះ ក្នុងការតាមដានកិច្ចប្រជុំនៅទីក្រុងប៉ារីស កាលពីសប្តាហ៍មុន៕