មូលនិធិរូបិយវត្ថុអន្តរជាតិ IMF បានកាត់បន្ថយចក្ខុវិស័យសកល កាលពីថ្ងៃអង្គារ (២២ មេសា) ដោយនិយាយថា ទិន្នផលសេដ្ឋកិច្ចទូទាំងពិភពលោកនឹងថយចុះនៅក្នុងប៉ុន្មានខែខាងមុខ ដោយសារពន្ធដ៏ច្រើន ដែលត្រូវផ្អាក ៩០ថ្ងៃរបស់លោកប្រធានាធិបតីអាមេរិក Donald Trump លើដៃគូពាណិជ្ជកម្មស្ទើរតែទាំងអស់ចាប់ផ្តើមជះផលប៉ះពាល់ ខណៈបណ្ដាប្រធានហិរញ្ញវត្ថុពិភពលោក បានចោមរោមទីក្រុងវ៉ាស៊ីនតោន ដើម្បីបង្កើនល្បឿនធ្វើកិច្ចព្រមព្រៀងជាមួយក្រុមរបស់លោក Trump ក្នុងការកាត់បន្ថយពន្ធ។

អ្នកនាំពាក្យសេតវិមាន លោកស្រី Karoline Leavitt បាននិយាយថា ជាការពិតណាស់ ល្បឿននៃកិច្ចចរចាពាណិជ្ជកម្មកំពុងដើរយ៉ាងលឿន ដោយមានប្រទេសចំនួន១៨ ផ្សេងៗគ្នាបានផ្តល់សំណើរួចហើយរហូតមកដល់ពេលនេះ ហើយក្រុមចរចាពាណិជ្ជកម្មរបស់លោក Trump គ្រោងនឹងជួបជាមួយប្រទេសចំនួន៣៤ផ្សេងទៀត នៅសប្តាហ៍នេះ ដើម្បីពិភាក្សាអំពីពន្ធ។

ជាមួយនឹងពន្ធមូលដ្ឋាន ១០% នៅតែមានលើទំនិញដែលចូលទៅក្នុងប្រទេសសេដ្ឋកិច្ចលេខ១ របស់ពិភពលោក ឥឡូវនេះមានកម្រិតខ្ពស់បំផុតក្នុងពេលមួយសតវត្ស មូលនិធិ IMF ព្យាករថា កំណើនសេដ្ឋកិច្ចសកលនៅឆ្នាំ២០២៥ នឹងថយចុះមកត្រឹម ២,៨% ដែលជាតួលេខអន់បំផុត ចាប់តាំងពីជំងឺរាតត្បាតកូវីដ១៩មក-ដោយធ្លាក់ចុះពីតួលេខ ៣,៣% ក្នុងឆ្នាំ២០២៤។

ការឈឺចាប់ផ្នែកសេដ្ឋកិច្ចក៏នឹងវាយលុកអាមេរិកខ្លួនឯងផ្ទាល់ផងដែរ ដោយ IMF ព្យាករថា កំណើនផលិតផលក្នុងស្រុកសរុប GDP របស់អាមេរិក នឹងធ្លាក់ ១% ពេញ មកត្រឹម ១,៨% ក្នុងឆ្នាំ២០២៥ ពីតួលេខ ២,៨% កាលពីឆ្នាំមុន ជាមួយនឹងការកម្រើក "គួរឱ្យកត់សម្គាល់" ចំពោះអតិផរណាអាមេរិក នៅពេលតម្លៃនាំចូលកើនឡើង៕