ប្រមុខអង្គការសុខភាពពិភពលោកបាននិយាយកាលពីថ្ងៃអង្គារទី ២២ ខែមេសា ថា ប្រតិបត្តិការ និងការងារ នឹងត្រូវបានកាត់បន្ថយ ខណៈការកាត់មូលនិធិរបស់សហរដ្ឋអាមេរិក បានធ្វើឱ្យទីភ្នាក់ងារអង្គការសហប្រជាជាតិ មានគម្លាតថវិកាជាច្រើនរយលានដុល្លារ។

លោក Tedros Adhanom Ghebreyesus បាននិយាយទៅកាន់រដ្ឋសមាជិកថា «ការធ្លាក់ចុះភ្លាមៗនៃប្រាក់ចំណូល បានធ្វើឱ្យយើងមានគម្លាតប្រាក់ខែច្រើន ហើយគ្មានជម្រើសអ្វីក្រៅពីកាត់បន្ថយទំហំការងារ និងកម្លាំងពលកម្មរបស់ខ្លួននោះទេ» ។

ទីភ្នាក់ងារសុខភាពរបស់អង្គការសហប្រជាជាតិ បាននឹងកំពុងត្រៀមទប់ទល់ផែនការដកខ្លួនចេញទាំងស្រុងរបស់ប្រធានាធិបតីសហរដ្ឋអាមេរិក លោក Donald Trump ដែលជាអ្នកផ្តល់ជំនួយធំបំផុត។ សហរដ្ឋអាមេរិកបានផ្តល់ថវិកាចំនួន១,៣ពាន់លានដុល្លារដល់អង្គការសុខភាពពិភពលោក សម្រាប់ថវិកាឆ្នាំ ២០២២ ដល់ឆ្នាំ២០២៣ ដែលជាចម្បងតាមរយៈការរួមចំណែកដោយស្ម័គ្រចិត្តសម្រាប់គម្រោងជាក់លាក់។

ប៉ុន្តែទីក្រុងវ៉ាស៊ីនតោន នៅពុំទាន់បានបង់ប្រាក់សម្រាប់ឆ្នាំ២០២៤ របស់ខ្លួននៅឡើយទេ ហើយមិនត្រូវបានគេរំពឹងថានឹងបង់ប្រាក់សម្រាប់ឆ្នាំ២០២៥នោះដែរ ដែលនេះបានធ្វើឱ្យអង្គការសុខភាពពិភពលោកត្រៀមរចនាសម្ព័ន្ធថ្មី ដែល លោក Tedros បានបង្ហាញដល់បុគ្គលិក និងរដ្ឋជាសមាជិក កាលពីថ្ងៃអង្គារ។

លោកបាននិយាយថា «ការបដិសេធរបស់សហរដ្ឋអាមេរិកក្នុងការបង់ការរួមចំណែកសម្រាប់ឆ្នាំ ២០២៤ និងឆ្នាំ២០២៥ រួមជាមួយនឹងការកាត់បន្ថយជំនួយអភិវឌ្ឍន៍ផ្លូវការដោយប្រទេសមួយចំនួនទៀត មានន័យថាយើងកំពុងប្រឈមនឹងគម្លាតប្រាក់ខែសម្រាប់ឆ្នាំ ២០២៦ ដល់២០២៧ ចន្លោះពី៥៦០ទៅ៦៥០ លានដុល្លារអាមេរិក។