នគរបាលបាននិយាយក្នុងថ្ងៃពុធ (២៣ មេសា) នេះថា មនុស្ស ២៦នាក់បានស្លាប់ និង ១៧នាក់បានរងរបួស នៅពេលដែលក្រុមសកម្មប្រយុទ្ធ សង្ស័យថាបានបើកការបាញ់ប្រហារទៅលើអ្នកទេសចរមួយក្រុមនៅក្នុងទឹកដី ចាមមូ (Jammu) និង កាស្មៀរ (Kashmir) គ្រប់គ្រងដោយឥណ្ឌា ដែលជាការវាយប្រហារដ៏អាក្រក់បំផុតនៅប្រទេសនេះក្នុងពេលជិត ២ទសវត្សរ៍។

ការវាយប្រហារនោះបានកើតឡើងកាលពីថ្ងៃអង្គារម្សិលមិញ នៅក្នុងទិសដៅទេសចរណ៍ដ៏ពេញនិយមមួយនៅ Pahalgam នៃទឹកដីសហព័ន្ធតំបន់ភ្នំហិម៉ាឡៃមួយនេះ ដែលបានមើលឃើញការងើបឡើងវិញនៃវិស័យទេសចរណ៍ដ៏ធំ ខណៈអំពើហិង្សាពីក្រុមបះបោរ ទើបតែបានធ្លាក់ចុះបន្តិចក្នុងប៉ុន្មានឆ្នាំថ្មីៗ។

នេះគឺជាការវាយប្រហារដ៏អាក្រក់បំផុតលើជនស៊ីវិលនៅឥណ្ឌា ចាប់តាំងពីការបាញ់ប្រហារនៅទីក្រុងបុមបៃ ឆ្នាំ២០០៨ មក ដែលមនុស្សជាង ១៦០នាក់ត្រូវបានសម្លាប់។ នគរបាលនិយាយថា ការវាយប្រហារបានកើតឡើងនៅក្នុងតំបន់វាលស្មៅ ហើយអ្នកស្លាប់រួមមានជនជាតិឥណ្ឌា ២៥នាក់ និងជនជាតិនេប៉ាល់ម្នាក់។

ក្រុមសកម្មប្រយុទ្ធដែលមានគេស្គាល់តិចតួច ឈ្មោះថា "ចលនាតស៊ូកាស្មៀរ" បានអះអាងទទួលខុសត្រូវចំពោះការវាយប្រហារនេះក្នុងសារប្រព័ន្ធផ្សព្វផ្សាយសង្គម។ ក្រុមនេះបានសម្តែងការមិនសប្បាយចិត្តដែលថា "អ្នកខាងក្រៅ" ជាង ៨៥.០០០នាក់ ទៅតាំងទីលំនៅក្នុងតំបន់នោះ ដែលជំរុញឱ្យមាន "ការផ្លាស់ប្តូរប្រជាសាស្រ្ត"។

លោកនាយករដ្ឋមន្ត្រី Narendra Modi បានប្រញាប់ត្រឡប់ទៅទីក្រុង New Delhi វិញនៅព្រឹកថ្ងៃពុធ ពីទស្សនកិច្ចរយៈពេលពីរថ្ងៃរបស់លោកទៅកាន់អារ៉ាប៊ីសាអ៊ូឌីត ដើម្បីដោះស្រាយលើឧបទ្ទវហេតុដ៏អាក្រក់នោះ៕