ក្រុមបាតុករបានចេញតវ៉ាពាសពេញដងផ្លូវក្នុងទីក្រុងនានានៃតំបន់ Jammu និង Kashmir របស់ប្រទេសឥណ្ឌាកាលពីថ្ងៃអង្គារ ២២ មេសា បន្ទាប់ពីការវាយប្រហារដោយក្រុមសកម្មប្រយុទ្ធបានសម្លាប់មនុស្សយ៉ាងហោចណាស់ ២៦ នាក់នៅក្នុងទីក្រុង Pahalgam របស់តំបន់នេះ។តំបន់ Jammu ត្រូវបានដាក់ស្ថិតក្នុងការប្រុងប្រយ័ត្នខ្ពស់ ។

អ្នកតវ៉ាមួយចំនួនបានស្រែកពាក្យស្លោកប្រឆាំងប៉ាគីស្ថាន ខណៈអ្នកខ្លះទៀតអំពាវនាវឲ្យរដ្ឋមន្ត្រីក្រសួងមហាផ្ទៃឥណ្ឌា លោក Amit Shah ចុះចេញពីតំណែង។

អ្នកនយោបាយក្នុងស្រុក និងជាអតីតសមាជិកសភាជាតិ លោក Fayaz Ahmad Mir បានចូលរួមការតវ៉ាដោយអុជទៀននៅក្នុងទីក្រុង Baramulla ក្នុងតំបន់ខាងលើ ហើយបានថ្កោលទោសការវាយប្រហារនេះ។

ការវាយប្រហារនេះបានកើតឡើងនៅទីក្រុង Pahalgam ដែលជាទិសដៅដ៏ពេញនិយមមួយនៅក្នុងតំបន់ភ្នំដ៏ស្រស់បំព្រង ជាទីដែលទេសចរណ៍ដ៏ធំ ជាពិសេសក្នុងរដូវក្តៅ បានកើនឡើងជាថ្មី ខណៈអំពើហិង្សារបស់ក្រុមសកម្មប្រយុទ្ធអ៊ីស្លាមបានធូរស្រាលក្នុងប៉ុន្មានឆ្នាំថ្មីៗនេះ។ ជនរងគ្រោះមិនត្រូវបានគេដឹងពីសញ្ជាតិអ្វីឡើយ។

ក្រុមសកម្មប្រយុទ្ធដែលមានគេស្គាល់តិចតួចគឺ ក្រុមតស៊ូ Kashmir បានអះអាងទទួលខុសត្រូវចំពោះការវាយប្រហារក្នុងសារប្រព័ន្ធផ្សព្វផ្សាយសង្គម។ សារព័ត៌មាន Reutersពុំអាចផ្ទៀងផ្ទាត់ប្រភពនៃសារនេះដោយឯករាជ្យបានទេ៕