ប្រធានាធិបតី របស់ប្រទេស អែល សាវ៉ាឌ័រ លោក Nayib Bukele បានឆ្លើយតបតាមរយៈការបង្ហោះនៅលើបណ្តាញ X កាលពីថ្ងៃអង្គារ ទី ២២ ខែមេសា ចំពោះការបដិសេធរបស់ប្រធានាធិបតី លោក Nicolas Maduro ជុំវិញការដោះដូរអ្នកទោស ហើយបានរំលឹកឡើងវិញនូវសំណើរបស់លោក ក្នុងការដោះលែងអ្នកទោសវ៉េណេស៊ុយអេឡាចំនួន២៥២នាក់ នៅប្រទេស អែល សាវ៉ាឌ័រ សម្រាប់ចំនួនអ្នកទោសដូចគ្នានៅលើទឹកដីវ៉េណេស៊ុយអេឡា។

ប្រធានាធិបតី អែល សាវ៉ាឌ័រ លោក Nayib Bukele បានស្នើកិច្ចព្រមព្រៀងមួយកាលពីថ្ងៃអាទិត្យ ទី២០ ខែមេសា ដើម្បីបញ្ជូនពលរដ្ឋវ៉េណេស៊ុយឡា២៥២នាក់ ដែលត្រូវបាននិរទេសពីសហរដ្ឋអាមេរិក និងបានដាក់ពន្ធនាគារនៅក្នុងប្រទេសរបស់លោក ត្រឡប់ទៅប្រទេសវ៉េណេស៊ុយអេឡាវិញ ជាថ្នូរនឹងការដោះលែងអ្នកជាប់ឃុំនៅក្នុងប្រទេសអាមេរិកខាងត្បូង ជាការលើកឡើងដែលត្រូវបានច្រានចោលដោយរដ្ឋាភិបាលប្រទេសវ៉េណេស៊ុយអេឡា។ អ្នកនិរទេសដែលត្រូវបានបញ្ជូនដោយរដ្ឋបាលរបស់លោក Trump ទៅកាន់ប្រទេសអែល សាល់វ៉ាឌ័រ កំពុងត្រូវបានឃុំខ្លួននៅក្នុងពន្ធនាគារប្រឆាំងអំពើភេរវកម្មដ៏ធំរបស់ប្រទេស ក្រោមកិច្ចព្រមព្រៀងដែលសហរដ្ឋអាមេរិកកំពុងបង់ប្រាក់ដល់រដ្ឋាភិបាលរបស់លោកប្រធានាធិបតី Nayib Bukele ចំនួន៦លានដុល្លារ។ ប្រធានាធិបតីវេណេស៊ុយអេឡា លោក Nicolas Maduro ក្នុងកម្មវិធីទូរទស្សន៍ប្រចាំសប្តាហ៍របស់លោក បានស្នើឱ្យសមភាគី អែល សាល់វ៉ាឌ័រ ដោះលែងពលរដ្ឋវ៉េណេស៊ុយអេឡា ២៥២នាក់ ដែលជាប់ឃុំឃាំងក្នុងពន្ធនាគារដោយគ្មានលក្ខខណ្ឌ និងទាមទារឱ្យ លោក Bukele «ផ្តល់ភស្តុតាងសម្រាប់ជីវិតយុវជនទាំងអស់ដែលត្រូវបានចាប់ជំរិត»។