អ្នកនាំពាក្យក្រសួងការបរទេសសហរដ្ឋអាមេរិក លោកស្រី Tammy Bruce បាននិយាយកាលពីថ្ងៃអង្គារ ថា រដ្ឋមន្ត្រីការបរទេសអាមេរិក លោក Marco Rubio នឹងមិនចូលរួមកិច្ចពិភាក្សានៅទីក្រុងឡុងដ៍ ចក្រភពអង់គ្លេស ស្តីពីសង្គ្រាមនៅក្នុងប្រទេសអ៊ុយក្រែនឡើយ បន្ទាប់ពីបាននិយាយកាលពីពេលមុនថា លោកមានគម្រោងធ្វើដំណើរទៅកាន់ទីក្រុងឡុងដ៍។

លោកស្រី Bruce បាននិយាយទៅកាន់អ្នកសារព័ត៌មាននៅក្នុងសន្និសីទសារព័ត៌មានប្រចាំថ្ងៃថា កិច្ចពិភាក្សានឹងដំណើរការទៅមុខ ហើយបេសកជន របស់ប្រធានាធិបតី Donald Trump ប្រចំានៅអ៊ុយក្រែន ឧត្តមសេនីយ៍ Keith Kellogg ស្ថិតនៅក្នុងទីក្រុងឡុងដ៍ ហើយនឹងចូលរួម។

ជាមួយគ្នានេះ ប្រធានាធិបតី លោក Volodymyr Zelenskiy បាននិយាយកាលពីថ្ងៃអង្គារ ថា គណៈប្រតិភូអ៊ុយក្រែននឹងជួបជាមួយមន្ត្រីមកពីបណ្តាប្រទេសលោកខាងលិចនៅទីក្រុងឡុងដ៍នៅថ្ងៃពុធ ទី២៣ ខែមេសានេះ ដែលនឹងមានកាតព្វកិច្ចពិភាក្សាអំពីបទឈប់បាញ់ពេញលេញ ឬដោយផ្នែក។

លោក បានប្រាប់អ្នកសារព័ត៌មាននៅក្នុងសន្និសីទថា អ៊ុយក្រែនបានត្រៀមខ្លួនជាស្រេចដើម្បីចរចាជាមួយរុស្ស៊ី ក្នុងទម្រង់ណាមួយដែលបទឈប់បាញ់កើតឡើង ហើយការប្រយុទ្ធគ្នារវាងកងកម្លាំងរបស់ទីក្រុង គីវ និងទីក្រុងមូស្គូ នឹងបញ្ឈប់។ ប៉ុន្តែ លោកបានព្រមានថា «អ៊ុយក្រែន នឹងមិនអាចព្រមព្រៀងភ្លាមៗលើអ្វីៗទាំងអស់បានទេ» ដោយនិយាយពីបញ្ហាស្មុគស្មាញជាច្រើនដូចជាទឹកដី ការធានាបានសន្តិសុខ និងសមាជិកភាពរបស់អ៊ុយក្រែនក្នុងសម្ព័ន្ធយោធាណាតូ។

កិច្ចពិភាក្សានៅទីក្រុងឡុងដ៍ គ្រោងនឹងជួបប្រជុំមន្ត្រីមកពីសហរដ្ឋអាមេរិក អង់គ្លេស បារាំង អាល្លឺម៉ង់ និងអ៊ុយក្រែន បានធ្វើឡើងក្នុងពេលមានកិច្ចខិតខំប្រឹងប្រែងផ្នែកការទូតដ៏ខ្លាំងក្លាដឹកនាំដោយសហរដ្ឋអាមេរិក ដើម្បីស្វែងរកមធ្យោបាយបញ្ចប់សង្រ្គាមរបស់រុស្ស៊ីជាមួយអ៊ុយក្រែន។