ប្រធានក្រុមធនាគារពិភពលោក លោក Ajay Banga បាននិយាយកាលពីថ្ងៃអង្គារថា ការទម្លាក់ការដំឡើងពន្ធ គឺល្អប្រសើរសម្រាប់មនុស្សគ្រប់គ្នា ខណៈលោកបានកត់សម្គាល់ថា លោកបានឃើញពាណិជ្ជកម្មអន្តរតំបន់ និងពាណិជ្ជកម្មទ្វេភាគី កើនឡើងក្នុងប៉ុន្មានឆ្នាំថ្មីៗនេះ។

លោក Banga បាននិយាយនៅក្នុងព្រឹត្តិការណ៍មួយក្នុងអំឡុងកិច្ចប្រជុំនិទាឃរដូវឆ្នាំ២ឥ២៥ នៃក្រុមធនាគារពិភពលោក (WBG) និងមូលនិធិរូបិយវត្ថុអន្តរជាតិ (IMF) ថា «សម្រាប់រយៈពេល១០ឆ្នាំចុងក្រោយនេះ ប្រសិនបើអ្នកក្រឡេកមើលចំនួនកិច្ចព្រមព្រៀងពាណិជ្ជកម្មទ្វេភាគី និងប្រចាំតំបន់ ដែលកំពុងត្រូវបានចុះហត្ថលេខានៅលើពិភពលោក វាលើសពីអ្វីដែលមនុស្សភាគច្រើនយកចិត្តទុកដាក់»។

លោក Banga បាននិយាយថាកិច្ចព្រមព្រៀងវឌ្ឍនភាពនិងគ្រប់ជ្រុងជ្រោយសម្រាប់ភាពជាដៃគូឆ្លងកាត់មហាសមុទ្រប៉ាស៊ីហ្វិក(CPTPP) និងភាពជាដៃគូសេដ្ឋកិច្ចគ្រប់ជ្រុងជ្រោយ(RCEP) ទាំងនេះគឺជាកិច្ចព្រមព្រៀងទាំងអស់ដែលពាក់ព័ន្ធនឹងក្រុមប្រទេសនៅក្នុងទសវត្សរ៍ចុងក្រោយនេះ ហើយវាបានផ្លាស់ប្តូររបៀបដែលពាណិជ្ជកម្មកំពុងធ្វើការនៅក្នុងប្រទេសទាំងនោះ។

ប្រធានធនាគារពិភពលោក ក៏បានកត់សម្គាល់ផងដែរថា ប្រទេសកំពុងអភិវឌ្ឍន៍ជាច្រើននៅតែមានការដំឡើងពន្ធខ្ពស់ជាងប្រទេសដែលមានសេដ្ឋកិច្ចជឿនលឿន។ «ដូច្នេះ សេរីភាវូបនីយកម្មដែលមានមូលដ្ឋានដ៏ទូលំទូលាយ មិនត្រឹមតែជាមួយដៃគូដែលពេញចិត្តប៉ុណ្ណោះទេ វាក៏អាចជួយទប់ទល់ហានិភ័យ និងពង្រីកដំណើរការចូលទីផ្សារផងដែរ»។

លោក Banga បាននិយាយទៅកាន់អ្នកសារព័ត៌មានថា ភាពមិនប្រាកដប្រជា និងភាពប្រែប្រួលកំពុងរួមចំណែកដល់បរិយាកាសសេដ្ឋកិច្ច និងធុរកិច្ច ដោយជំរុញឱ្យប្រទេសនានាចរចា និងចូលរួមក្នុងកិច្ចសន្ទនាលើបញ្ហាពាណិជ្ជកម្ម។