រុស្ស៊ី បានច្រានចោលការទាមទាររបស់លោកប្រធានាធិបតីអាមេរិក Donald Trump ក្នុងការបញ្ចប់សង្រ្គាមរបស់ខ្លួនលើអ៊ុយក្រែន នៅសប្តាហ៍នេះ ដោយអ្នកនាំពាក្យជាន់ខ្ពស់របស់វិមានក្រឹមឡាំង ប្រាប់អ្នកសារព័ត៌មានថា ការដាក់ "ពេលវេលាកំណត់ដ៏តឹងរ៉ឹង" បែបនេះគឺជា "រឿងគ្មានប្រយោជន៍" ដែលជាវោហាសាស្រ្តប្រកាន់តឹងចុងក្រោយរបស់ទីក្រុងមូស្គូ លើកិច្ចចរចាសន្តិភាព ទោះបីជាមានសេចក្ដីរាយការណ៍ថាប្រធានាធិបតីរុស្ស៊ី ព្រមធ្វើសម្បទានខ្លះក៏ដោយ។

លោក Trump កាលពីថ្ងៃសុក្រសប្ដាហ៍មុន បានគំរាមថា លោកត្រៀមខ្លួនរួចជាស្រេចដើម្បីដើរចេញពីកិច្ចប្រឹងប្រែងសន្តិភាពអ៊ុយក្រែនរបស់លោក ប្រសិនបើកិច្ចព្រមព្រៀងមិនកើតឡើង "ក្នុងរយៈពេលប៉ុន្មានថ្ងៃ" ខាងមុខទេនោះ ហើយនៅថ្ងៃចន្ទដើមសប្ដាហ៍នេះ លោកក៏បានប្រាប់អ្នកយកព័ត៌មានថា លោកនឹងបង្ហាញបន្ថែមទៀតអំពីផែនការបញ្ឈប់សង្រ្គាមនៅថ្ងៃព្រហស្បតិ៍ស្អែកនេះ។

ប៉ុន្តែអ្នកនាំពាក្យវិមានក្រឹមឡាំង លោក Dmitry Peskov កាលពីថ្ងៃអង្គារ បាននិយាយថា ប្រទេសរុស្ស៊ី មិនបានដឹងពីលក្ខខណ្ឌនៃផែនការនេះទេ ដោយឆ្លើយតបទៅនឹងរបាយការណ៍របស់កាសែត The Post អំពីព័ត៌មានលម្អិតដំបូងនៃការរៀបចំដែលបានស្នើឡើងនោះ។

លោក Peskov បានប្រាប់សារព័ត៌មានរុស្ស៊ី VGTRK ថា "ដំណោះស្រាយរឿងអ៊ុយក្រែន ស្មុគ្រស្មាញបំផុត ដូច្នេះគេស្ទើរតែមិនអាចកំណត់ពេលវេលា ឬប្រញាប់ដោះស្រាយជម្លោះក្នុងពេលខ្លីបានឡើយ ហើយការដាក់ថ្ងៃកំណត់បែបនេះជារឿងឥតប្រយោជន៍ប៉ុណ្ណោះ"។ ទោះយ៉ាងណាក៏ដោយ លោកបន្ថែមថា ទីក្រុងមូស្គូនឹង "បន្តទំនាក់ទំនងជាមួយភាគីអាមេរិក តាមរយៈបណ្តាញផ្សេងៗលើរឿងនោះ"៕