ទីភ្នាក់ងារព័ត៌មានផ្លូវការ IRNA បានរាយការណ៍កាលពីថ្ងៃអង្គារថា កងទ័ពជើងទឹកនៃកងឆ្មាំបដិវត្តន៍ឥស្លាមអ៊ីរ៉ង់ (IRGC) បានរឹបអូសនាវាបរទេសពីរគ្រឿង ដែលផ្ទុកប្រេងរត់ពន្ធចំនួន ១,៥ លានលីត្រ។

សារព័ត៌មាន IRNA បានដកស្រង់សម្តីលោក Masoud Foroutan មេបញ្ជាការរងនៃកងពលធំលេខ២នៃកងទ័ពជើងទឹករបស់កងឆ្មាំបដិវត្តន៍ឥស្លាមអ៊ីរ៉ង់ (IRGC) ដែលបាននិយាយថា នាវាទាំងពីរគ្រឿង បានរត់ពន្ធប្រេងម៉ាស៊ូត ដែលមានតម្លៃ ៧០០ ពាន់លានរៀលអ៊ីរ៉ង់ (ប្រហែល ៨៧៥.000 ដុល្លារអាមេរិក នៅក្នុងទីផ្សាររូបិយប័ណ្ណបរទេស) នៅឯព្រំដែនសមុទ្រនៃខេត្ត Bushehr ភាគខាងត្បូងនៃប្រទេសអ៊ីរ៉ង់ ដោយ ពុំបានបញ្ជាក់អំពីកាលបរិចេ្ឆទនៃការចាប់នាវាទាំងនេះ។

លោកបាននិយាយថា នាវាដែលមានទង់ជាតិតង់ហ្សានីទាំងពីរ ហៀបនឹងចាកចេញពីដែនទឹករបស់អ៊ីរ៉ង់ នៅពេលដែលពួកវា ត្រូវបានរឹបអូស នៅជិតកោះ Farsi ។

លោក Foroutan បានកំណត់អត្តសញ្ញាណនាវាទាំងនោះថា ជា «Sea Ranger» និង «SALAMA» ដោយបន្ថែមថា សមាជិកនាវិកបរទេសចំនួន ២៥នាក់ នៅលើនាវាទាំងនោះ។

លោកបានបញ្ជាក់ថា នាវាទាំងពីរនេះ ត្រូវបានបញ្ជូនទៅកាន់កំពង់ផែ Bushehr ហើយប្រេងឥន្ធនៈដែលពួកគេ មានបំណងរត់ពន្ធចេញពីប្រទេសនេះ នឹងត្រូវប្រគល់ទៅឲ្យក្រុមហ៊ុនចែកចាយផលិតផលប្រេងជាតិអ៊ីរ៉ង់ តាមនីតិវិធីច្បាប់។

យោងតាមមន្ត្រីយោធាបានឲ្យដឹងថា កងទ័ពជើងទឹកនៃកងឆ្មាំបដិវត្តន៍ឥស្លាមអ៊ីរ៉ង់ (IRGC) បានរឹបអូសយកប្រេងរត់ពន្ធចំនួន ៤,៥ លានលីត្រ នៅក្នុងដែនទឹកភាគខាងត្បូងរបស់ប្រទេសនេះ ចាប់តាំងពីដើមឆ្នាំរបស់អ៊ីរ៉ង់បច្ចុប្បន្ន ដែលបានចាប់ផ្តើម នៅថ្ងៃទី ២១ ខែមីនា ឆ្នាំ ២០២៥។