ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃអង្គារ បានប្រកាសពីផែនការរៀបចំកិច្ចប្រជុំកំពូលជាមួយក្រុមរដ្ឋសម្ព័ន្ធអារ៉ាប់ នៅចុងឆ្នាំនេះ ខណៈដែលទីក្រុងមូស្គូ ស្វែងរកដៃគូថ្មី បន្ទាប់ពីការវាយលុក រយៈពេលបីឆ្នាំរបស់ខ្លួន លើប្រទេសអ៊ុយក្រែន។

ដោយរងការដាក់ទណ្ឌកម្មលោកខាងលិចយ៉ាងធ្ងន់ធ្ងរ បន្ទាប់ពីការបញ្ជូនកងទ័ពចូលទៅក្នុងអ៊ុយ ក្រែន ប្រទេសរុស្ស៊ី បានងាកទៅរកប្រទេសអាស៊ី អាហ្វ្រិក និងអារ៉ាប់ ដើម្បីទំនាក់ទំនងនយោបាយ និងសេដ្ឋកិច្ច។

លោក ពូទីន បានប្រាប់ស្តេចស៊ុលតង់នៃប្រទេសអូម៉ង់ Haitham bin Tariq ក្នុងដំណើរទស្សនកិច្ចលើកដំបូងមិនធ្លាប់មានទៅកាន់ប្រទេសរុស្ស៊ីដោយប្រមុខរដ្ឋអូម៉ង់ថា៖«យើងមានគម្រោងរៀបចំកិច្ចប្រជុំកំពូលរវាងរុស្ស៊ី និងបណ្តាប្រទេសអារ៉ាប់ នៅឆ្នាំនេះ»។

លោកបានបន្ថែមថា៖«មិត្តភ័ក្តិរបស់យើងជាច្រើន នៅក្នុងពិភពអារ៉ាប់ គាំទ្រគំនិតនេះ» ដោយបានអញ្ជើញស្តេចស៊ុលតង់នៃប្រទេសអូម៉ង់ ទៅចូលរួមកិច្ចប្រជុំកំពូលនេះ ដោយមិនបានបញ្ជាក់កាលបរិច្ឆេទ និងទីកន្លែងទេ។

ដំណើរទស្សនកិច្ចរបស់ស្តេចស៊ុលតង់នេះ ធ្វើឡើងប៉ុន្មានថ្ងៃបន្ទាប់ពីលោក ពូទីន បានធ្វើជាម្ចាស់ផ្ទះទទួលមេដឹកនាំប្រទេសកាតាលោក Sheikh Tamim bin Hamad Al-Thani ក្នុងការពិភាក្សាអំពីស៊ីរី និងតំបន់ហ្កាហ្សា។

ទីក្រុង Doha គឺជាអ្នកសម្រុះសម្រួលដ៏សំខាន់រវាងអ៊ីស្រាអែល និងក្រុមប៉ាឡេស្ទីនហាម៉ាស។

រដ្ឋឈូងសមុទ្រ កំពុងទទួលបានឥទ្ធិពលការទូតកាន់តែខ្លាំងឡើង ក្នុងនាមជាអ្នកសម្រុះសម្រួល ក្នុងការចរចា ដើម្បីដោះស្រាយវិបត្តិដ៏ធ្ងន់ធ្ងរបំផុតរបស់ពិភពលោក ដែលបានឆក់យកជីវិតមនុស្សរាប់ពាន់នាក់ ដូចជាជម្លោះនៅអ៊ុយក្រែន និងហ្កាហ្សាជាដើម។