ក្រុមឧទ្ទាមហ៊ួទីនៅប្រទេសយេម៉ែន នៅព្រឹកថ្ងៃពុធនេះ បានបាញ់មីស៊ីល ឆ្ពោះទៅភាគខាងជើងប្រទេស អ៊ីស្រាអែល ដែលជាគោលដៅដ៏កម្រមួយសម្រាប់ក្រុមនេះ ខណៈដែលយុទ្ធនាការវាយប្រហារតាមអាកាសដ៏ខ្លាំងក្លារយៈពេលមួយខែរបស់សហរដ្ឋអាមេរិក នៅតែបន្តកំណត់គោលដៅពួកគេ។

យោធាអ៊ីស្រាអែល បាននិយាយថា ស៊ីរ៉ែនបានបន្លឺឡើង នៅក្នុងទីក្រុង Haifa, Krayot និងតំបន់ផ្សេងទៀត នៅភាគខាងលិចនៃសមុទ្រ Galilee។

យោធាអ៊ីស្រាអែល បានអះអាងថា៖«ឧបករណ៍ស្ទាក់ចាប់មួយ ត្រូវបានបាញ់ឆ្ពោះទៅកាន់មីស៊ីល ហើយ មីស៊ីលនេះ ទំនងជាត្រូវបានស្ទាក់ចាប់ដោយជោគជ័យ»។អ្នកដែលនៅក្នុងតំបន់នេះ មានការភ្ញាក់ផ្អើលយ៉ាងខ្លាំង ទាំងនៅក្នុងភាពងងឹតមុនពេលថ្ងៃរះ។

ក្រុមហ៊ួទី មិនបានអះអាងពីការវាយប្រហារភ្លាមៗនោះទេ ទោះបីជាអាចប្រើពេលរាប់ម៉ោង ឬច្រើនថ្ងៃ ដើម្បីទទួលស្គាល់ការវាយប្រហាររបស់ពួកគេក៏ដោយ។

ទន្ទឹមនឹងនោះ ការវាយប្រហារតាមអាកាសរបស់អាមេរិក បានបន្តកំណត់គោលដៅទៅលើក្រុមហ៊ួទី នាព្រឹកថ្ងៃពុធនេះ ជាផ្នែកនៃយុទ្ធនាការដែលបានចាប់ផ្តើមនៅថ្ងៃទី ១៥ ខែមីនា។ ក្រុមហ៊ួទីបានរាយការណ៍អំពីការវាយប្រហារទៅលើខេត្ត Hodeida, Marib និង Saada។ នៅក្នុងខេត្ត Marib ក្រុមហ៊ួទី បានពណ៌នាអំពីការវាយប្រហារដែលបានត្រូវចំឧបករណ៍ទូរគមនាគមន៍ ដែលពីមុនជាគោលដៅរបស់ជនជាតិអាមេរិក។

ទីបញ្ជាការកណ្តាលរបស់យោធាអាមេរិក មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។

សហរដ្ឋអាមេរិក កំពុងកំណត់គោលដៅទៅលើក្រុមហ៊ួទី ដោយសារតែការវាយប្រហាររបស់ក្រុមនេះ ទៅលើការដឹកជញ្ជូននៅសមុទ្រក្រហម ដែលជាផ្លូវពាណិជ្ជកម្មពិភពលោកដ៏សំខាន់ និងលើប្រទេសអ៊ីស្រាអែល។ ក្រុមហ៊ួទី គឺជាក្រុមសកម្មប្រយុទ្ធចុងក្រោយ នៅក្នុង «អ័ក្សនៃការតស៊ូ»របស់ប្រទេសអ៊ីរ៉ង់ ដែលមានសមត្ថភាពវាយប្រហារអ៊ីស្រាអែល ជាប្រចាំ។