ប្រធានាធិបតីអាមេរិក លោក ដូណាល់ ត្រាំ បានប្រាប់អ្នកយកព័ត៌មាននៅសេតវិមានថា សហរដ្ឋអាមេរិកនឹងមិនអនុញ្ញាតឲ្យក្រុមសកម្មប្រយុទ្ធប៉ាឡេស្ទីនហាម៉ាស ចូលរួមក្នុងរដ្ឋបាលរបស់តំបន់ហ្កាហ្សា ស្ទ្រីប នាពេលអនាគតនោះទេ។

នៅពេលសួរដោយអ្នកសារព័ត៌មានថា តើទីក្រុងវ៉ាស៊ីនតោននឹងរារាំងក្រុមហាម៉ាសពីតួនាទីណាមួយ ក្នុងការគ្រប់គ្រងតំបន់ហ្កាហ្សា បន្ទាប់ពីជម្លោះនោះ លោក ត្រាំ បានឆ្លើយតបថា៖«យើងនឹងមិនអនុញ្ញាតឲ្យ ក្រុមហាម៉ាស ធ្វើដូច្នេះទេ»។

លោកបានបន្តទៀតថា៖«យើងនឹងឃើញអ្វីដែលកើតឡើងជាមួយតំបន់ហ្កាហ្សា ប៉ុន្តែយើងបានធ្វើឲ្យមានការរីកចម្រើនជាច្រើន នៅមជ្ឈិមបូព៌ា»។

លោក ត្រាំ បានបន្ថែមថា៖«កាលបរិច្ឆេទពិសេសនោះ គឺថ្ងៃទី ០៧ ខែតុលា មិនគួរកើតឡើងទេ។ វានឹងមិន កើតឡើងទេ ប្រសិនបើខ្ញុំ ជាប្រធានាធិបតី ប៉ុន្តែយើងនឹងបញ្ឈប់ស្ថានភាពទាំងស្រុង »។

ភាពតានតឹង បានផ្ទុះឡើងម្តងទៀតនៅមជ្ឈិមបូព៌ា នៅថ្ងៃទី ០៧ ខែតុលាឆ្នាំ ២០២៣ នៅពេលដែលក្រុម សកម្មប្រយុទ្ធមកពីចលនាបដិវត្តន៍ប៉ាឡេស្ទីនហាម៉ាស ដែលមានមូលដ្ឋាននៅតំបន់ហ្កាហ្សាស្ទ្រីប បានបើកការវាយប្រហារដ៏គួរឲ្យភ្ញាក់ផ្អើលមួយ លើទឹកដីអ៊ីស្រាអែល ដោយបានសម្លាប់អ្នករស់នៅតាមព្រំដែនអ៊ីស្រាអែល និងចាប់ចំណាប់ថ្នូរជាច្រើននាក់។ ជាការសងសឹក អ៊ីស្រាអែល បានចាប់ផ្តើមយុទ្ធនាការយោធានៅតំបន់ហ្កាហ្សា ក្នុងគោលបំណងរុះរើហេដ្ឋារចនាសម្ព័ន្ធនយោបាយ និងយោធារបស់ក្រុមហាម៉ាស និងធានាការដោះលែងចំណាប់ខ្មាំង។ ចាប់តាំងពីពេលនោះមក ប្រជាជនប៉ាឡេស្ទីនជាង ៥១.000នាក់ ត្រូវបានសម្លាប់ នៅក្នុងអរិភាព ហើយប្រហែល ១១៧.000 នាក់ផ្សេងទៀត បានរងរបួស។