ការចុះផ្សាយរបស់ទីភ្នាក់ងារព័ត៌មាន ស៊ីនហួ បានឱ្យដឹងថា ប្រធានាធិបតីចិន លោក Xi Jinping បានលើកឡើងនៅថ្ងៃពុធ (២៣ មេសា) នេះថា សង្គ្រាមពន្ធគយ និងពាណិជ្ជកម្ម ធ្វើឱ្យប៉ះពាល់ដល់សិទ្ធិ និងផលប្រយោជន៍ស្របច្បាប់របស់ប្រទេសទាំងអស់ ធ្វើឱ្យខូចដល់ប្រព័ន្ធពាណិជ្ជកម្មពហុភាគី និងប៉ះពាល់ដល់សណ្តាប់ធ្នាប់សេដ្ឋកិច្ចពិភពលោក។

លោក Xi បានធ្វើអត្ថាធិប្បាយបែបនេះក្នុងអំឡុងកិច្ចប្រជុំជាមួយប្រធានាធិបតីអាស៊ែបៃហ្សង់ លោក Ilham Aliyev ក្នុងទីក្រុងប៉េកាំង ជាទីដែលលោកនិយាយថា ចិនមានឆន្ទៈក្នុងការធ្វើការជាមួយ អាស៊ែបៃហ្សង់ ដើម្បីការពារប្រព័ន្ធអន្តរជាតិ និងបន្តការអនុវត្តច្បាប់ "បែបស៊ីជម្រៅ" ព្រមទាំងកិច្ចសហប្រតិបត្តិការសន្តិសុខ ជាមួយភាគីអាស៊ែបៃហ្សង់។

សារព័ត៌មាន ស៊ីនហួ រាយការណ៍ថា "ចិនបានត្រៀមខ្លួនជាស្រេចក្នុងការធ្វើការជាមួយភាគីអាស៊ែបៃហ្សង់ ដើម្បីលើកកម្ពស់ប្រព័ន្ធអន្តរជាតិ ជាមួយអង្គការសហប្រជាជាតិជាស្នូល និងការពារភាពត្រឹមត្រូវ និងយុត្តិធម៌អន្តរជាតិ"។

ទន្ទឹមនឹងនេះ មេដឹកនាំទាំងពីរក៏បានប្រកាស "ការបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយរវាងចិន និងអាស៊ែបៃហ្សង់" ព្រមទាំងចុះហត្ថលេខាលើឯកសារសហប្រតិបត្តិការចំនួន២០ ជាផ្នែកមួយនៃគំនិតផ្តួចផ្តើមខ្សែក្រវ៉ាត់ និងផ្លូវ BRI របស់ចិន៕