អ៊ីស្រាអែល បានបញ្ឈប់ដោយស្ងាត់ស្ងៀមនូវការកំណត់យកផ្នែកមួយចំនួននៃតំបន់ហ្កាហ្សា ធ្វើជាតំបន់មនុស្សធម៌លើផែនទីយោធា ចាប់តាំងពីខ្លួនបន្តការវាយប្រហារដ៏បង្ហូរឈាមឡើងវិញលើទឹកដីប៉ាឡេស្ទីនដ៏តូចចង្អៀតមួយនេះកាលពីខែមុន។ សកម្មភាពនេះបានបង្កើនការភ័យខ្លាចក្នុងចំណោមបុគ្គលិកជំនួយ ចំពោះសុវត្ថិភាពរបស់ជនស៊ីវិលដែលស្នាក់នៅទីតាំង ដែលពីមុនធ្លាប់ត្រូវបានចាត់ទុកថាជាកន្លែងមានការការពារពីការបាញ់ប្រហារ។

ទឹកដីដ៏តូចមួយផ្នែកនៅតំបន់ហ្កាហ្សា ភាគខាងត្បូង ត្រូវបានកំណត់ដោយអ៊ីស្រាអែល ក្នុងខែធ្នូ ឆ្នាំ២០២៣ ថាជា "តំបន់មនុស្សធម៌" ជាទីដែលជនស៊ីវិលត្រូវបានប្រាប់ឱ្យភៀសខ្លួនទៅដោយសុវត្ថិភាព។ តំបន់មនុស្សធម៌ទាំងនេះត្រូវពង្រីកកាលពីខែឧសភា ឆ្នាំមុន ដោយគ្របដណ្តប់តំបន់ធំមួយនៅភាគនិរតីហ្កាហ្សា រួមមានក្រុង Khan Younis ក្រុង Deir al-Balah និង al-Mawasi ជាដើម។

រហូតមកដល់ខែមករា តំបន់មនុស្សធម៌ត្រូវបានគូសនៅលើផែនទី ដែលបង្ហោះតាមអ៊ីនធឺណិត និងទម្លាក់ពីលើអាកាសដោយកងកម្លាំងការពារអ៊ីស្រាអែល (IDF) ទៅឱ្យពលរដ្ឋប៉ាឡេស្ទីន។ ជាលទ្ធផល មនុស្សជាង ១លាននាក់បាននាំគ្នាភៀសខ្លួនទៅតំបន់នោះ។ ប៉ុន្តែការលើកឡើងពីតំបន់មនុស្សធម៌ទាំងនេះ បានបាត់ចេញពីផែនទី ចាប់តាំងពីបទឈប់បាញ់របស់អ៊ីស្រាអែល ជាមួយក្រុមហាម៉ាស បានដួលរលំនៅក្នុងខែមីនាមក ដែលបង្កភាពមិនច្បាស់លាស់ដល់សុវត្ថិភាពមនុស្សជាង ១លាននាក់នោះ។

គួរឱ្យដឹងថា តំបន់មនុស្សធម៌មិនមានសុវត្ថិភាពទាំងស្រុងទេ ខណៈតួលេខផ្លូវការបានបង្ហាញថា ទីតាំងនោះត្រូវវាយប្រហារដោយអ៊ីស្រាអែល យ៉ាងហោចណាស់ ២៨ដង នៅមុនខែមករា ហើយការស៊ើបអង្កេតរបស់សារព័ត៌មាន BBC បានដាក់តួលេខដល់ទៅ ៩៧ដង ដោយមនុស្ស ៥៥០នាក់ត្រូវសម្លាប់៕