សេចក្ដីរាយការណ៍ពីសារព័ត៌មាន Yedioth Ahronoth បានឱ្យដឹងថា កងទ័ពអ៊ីស្រាអែល ប៉ាន់ប្រមាណថា ខ្លួននឹងត្រូវការប្រាក់បន្ថែមចំនួន ១០ពាន់លានស្ហាកែល ឬប្រមាណជា ២,៦ពាន់លានដុល្លារអាមេរិក ដើម្បីពង្រីកសង្រ្គាមរបស់ខ្លួននៅលើតំបន់ហ្កាហ្សាស្ទ្រីប។

កាសែតមួយនេះបាននិយាយថា "ការបន្តសង្រ្គាមនៅតំបន់ហ្កាហ្សា ឡើងវិញជាងមួយខែមុន បន្ទាប់ពីបទឈប់បាញ់ត្រូវបញ្ចប់ និងផែនការពង្រីកជម្លោះនោះជាមួយនឹងប្រតិបត្តិការជើងគោកទ្រង់ទ្រាយធំ កំពុងជំរុញការចំណាយយ៉ាងសំខាន់” ហើយរឿងនេះត្រូវបានជំទាស់យ៉ាងខ្លាំងដោយក្រសួងហិរញ្ញវត្ថុ។

មន្ត្រីជាន់ខ្ពស់ម្នាក់បានប្រាប់កាសែត Yedioth ថា "នេះជារឿងមិនអាចនឹកស្មានដល់ ដែលថាទឹកប្រាក់ ២,៦ពាន់លានដុល្លារ ផ្សេងទៀតអាចត្រូវបានបញ្ចូលទៅក្នុងថវិកាការពារជាតិសម្រាប់យុទ្ធនាការយោធា ទោះបីជាមានទឹកប្រាក់ប្រមាណ ៣១ពាន់លានដុល្លារ ដែលត្រូវបានបែងចែករួចទៅហើយក្ដី - រួមទាំងការប្រើប្រាស់មូលនិធិបម្រុង ២,៦ពាន់លានដុល្លារ"។

របាយការណ៍បញ្ជាក់ថា ការចំណាយបន្ថែមនោះនឹងត្រូវបានប្រើដើម្បីដណ្តើមយកទឹកដីប្រហែល ៤០% នៃតំបន់ហ្កាហ្សា ក្នុងប៉ុន្មានសប្តាហ៍ខាងមុខ ពង្រឹងសន្តិសុខនៃការតាំងទីលំនៅរបស់អ៊ីស្រាអែល នៅជិតព្រំដែនហ្កាហ្សា និងទប់ស្កាត់ការបន្តការបាញ់រ៉ូកែតចូលអ៊ីស្រាអែល។

គួរឱ្យដឹងថា យោងតាមតួលេខ ដែលចេញផ្សាយដោយកាសែតសេដ្ឋកិច្ចអ៊ីស្រាអែល Calcalist នៅដើមឆ្នាំនេះ អ៊ីស្រាអែល បានចំណាយប្រាក់ចំនួន ២៥០ពាន់លានស្ហាកែល (៦៧,៥៧ ពាន់លានដុល្លារ) ក្នុងឆ្នាំ២០២៤ សម្រាប់ការវាយលុកផ្នែកយោធារបស់ខ្លួននៅលើតំបន់ហ្កាហ្សាស្ទ្រីប៕