រដ្ឋមន្ត្រីការបរទេសចិន លោក Wang Yi កាលពីថ្ងៃអង្គារ (ទី២២ ខែមេសា) បានជំរុញឲ្យចក្រភពអង់គ្លេស និងសហភាពអឺរ៉ុប (EU) ការពារប្រព័ន្ធពាណិជ្ជកម្មពហុភាគី ខណៈដែលទីក្រុងប៉េកាំង ប្រឹងប្រែងកៀរគរការគាំទ្រពីដៃគូពាណិជ្ជកម្មនានា ដើម្បីតបតនឹងវិធានការពន្ធរបស់សហរដ្ឋអាមេរិក។

បើយោងតាមសេចក្តីថ្លែងការណ៍របស់ក្រសួងការបរទេសចិន បានឲ្យដឹងថា អំឡុងពេលជជែកតាមទូរសព្ទ លោក Wang បានប្រាប់រដ្ឋមន្ត្រីការបរទេសអង់គ្លេស លោក David Lammy ថា ប្រទេសចិន និងអង់គ្លេស មានការទទួលខុសត្រូវ ក្នុងការធ្វើឲ្យសណ្តាប់ធ្នាប់អន្តរជាតិកាន់តែប្រសើរឡើង នៅចំពោះមុខ «ការគំរាមកំហែងយ៉ាងខ្លាំងក្លាជាឯកតោភាគី»។

អមដោយការបន្ថែមថា ការទទួលខុសត្រូវ គឺស្ថិតនៅលើប្រទេសទាំង២ ដើម្បីការពារប្រព័ន្ធពាណិជ្ជកម្មពហុភាគី លោក Wang បានបញ្ជាក់ថា ប្រទេសចិនបានត្រៀមខ្លួនជាស្រេច ដើម្បីធ្វើការជាមួយចក្រភពអង់គ្លេស ដើម្បី «លុបបំបាត់ការរំខានទាំងអស់»។

ជាមួយគ្នានេះ នៅក្នុងការជជែកតាមទូរសព្ទដាច់ដោយឡែកមួយទៀតជាមួយរដ្ឋមន្ត្រីការបរទេសអូទ្រីស លោកស្រី Beate Meinl-Reisinger លោក Wang បានលើកឡើងស្រដៀងគ្នាថា ប្រទេសចិន និងសហភាពអឺរ៉ុប គួរតែរែកពុនការទទួលខុសត្រូវអន្តរជាតិ ដើម្បីការពារពាណិជ្ជកម្មពហុភាគី និងកសាងសេដ្ឋកិច្ចពិភពលោកបើកចំហ។

ហើយចុងក្រោយ លោកក៏បានសង្កត់ធ្ងន់ផងដែរថា ប្រទេសចិនមានឆន្ទៈ ក្នុងការពង្រឹងបន្ថែមទៀតនូវការផ្លាស់ប្តូរកម្រិតខ្ពស់ជាមួយសហភាពអឺរ៉ុប៕