ប្រធានាធិបតីអាមេរិកលោក Donald Trump កាលពីថ្ងៃអង្គារ (ទី២២ ខែមេសា) បាននិយាយថា លោកមិនមានគម្រោងបណ្តេញប្រមុខធនាគារសហព័ន្ធ (Federal Reserve) នោះឡើយ ជាការកត់សម្គាល់ស្រុះស្រួលគ្នាដោយជាក់ស្តែង បន្ទាប់ពីមានការស្តីបន្ទោសរូបលោក និងការបង្កឲ្យទីផ្សារចលាចល។

វិនិយោគិនផ្សារហ៊ុន Wall Street បានលក់ទ្រព្យសកម្មរបស់សហរដ្ឋអាមេរិកក្នុងតម្លៃទាប នៅថ្ងៃពុធ (ទី២៣ ខែមេសា) នេះ ដោយសន្ទស្សន៍ភាគហ៊ុនធំៗទាំង៣ បានធ្លាក់ចុះ បន្ទាប់ពីលោក Trump បានរិះគន់ជាបន្តបន្ទាប់ទៅលើលោក Jerome Powell ដែលប្រធានធនាគារកណ្តាលអាមេរិក។

គួរបញ្ជាក់ថា លោកប្រធានាធិបតី បានរិះគន់លោក Powell ពាក់ព័ន្ធនឹងការព្រមាន ដែលថា គោលនយោបាយពន្ធគយរបស់សេតវិមាន នឹងអាចធ្វើឲ្យមានអតិផរណា។

នៅថ្ងៃទី២២ ខែមេសា លោក Trump បាននិយាយថា៖ «ខ្ញុំមិនមានចេតនាបណ្តេញរូបគាត់ទេ។ ខ្ញុំចង់ឃើញគាត់មានវិធានការសកម្មជាងនេះបន្តិច ពាក់ព័ន្ធនឹងគំនិតរបស់គាត់ ក្នុងការបញ្ចុះអត្រាការប្រាក់ វាជាពេលវេលាដ៏ល្អឥតខ្ចោះ ដើម្បីបញ្ចុះអត្រាការប្រាក់។ ប្រសិនបើគាត់មិនធ្វើទេ តើវាគឺជាទីបញ្ចប់របស់ពិភពលោកឬ? មិនមែនបែបនោះទេ»។

ការផ្ទុះកំហឹងថ្មីៗនេះរបស់លោក Trump ចំពោះលោក Powell បានធ្វើឲ្យអ្នកគាំទ្រព្រួយបារម្ភថា រូបលោកនឹងត្រូវបានបណ្តេញចេញ ស្របពេលដែលទីប្រឹក្សាសេដ្ឋកិច្ចសេតវិមាន លោក Kevin Hassett បាននិយាយកាលពីសប្តាហ៍មុនថា លោកប្រធានាធិបតីកំពុងសម្លឹងមើលថា តើលោកអាចធ្វើដូច្នេះបានដែរ ឬយ៉ាងណា៕