តួលេខផ្លូវការ កាលពីថ្ងៃអង្គារ (ទី២២ ខែមេសា) បានបង្ហាញថា មនុស្សចំនួន ៧,៣លាននាក់ បានចេញទៅបោះឆ្នោតមុនពេល ក្នុងរយៈពេល ៤ថ្ងៃមកនេះ សម្រាប់ការបោះឆ្នោតរបស់ប្រទេសកាណាដា ជាសញ្ញាដែលបញ្ជាក់ពីការចាប់អារម្មណ៍ខ្លាំងឡើងៗ នៅក្នុងការបោះឆ្នោត នាថ្ងៃទី២៨ ខែមេសា។

ទីភ្នាក់ងារតាមដានការបោះឆ្នោតកាណាដា បានឲ្យដឹងថា ចំនួនប៉ាន់ស្មានរបស់ខ្លួន សម្រាប់ការបោះឆ្នោត ចាប់ពីថ្ងៃសុក្រដល់ថ្ងៃចន្ទ បានបង្ហាញពីការកើនឡើង ២៥ភាគរយនៃសន្លឹកឆ្នោតចំនួន ៥,៨លានសន្លឹកដែលត្រូវបានបោះ នៅក្នុងការបោះឆ្នោតឆ្នាំ២០២១។

បើតាមទីភ្នាក់ងារតាមដានការបោះឆ្នោតកាណាដា បានឲ្យដឹងកាលពីខែវិច្ឆិកាថា សម្រាប់កាណាដាដែលជាប្រទេសមានប្រជាជនចំនួន ៤១លាននាក់ អ្នកមានសិទ្ធិបោះឆ្នោត គឺចំនួន ២៨,៩លាននាក់៕

មានការចង្អុលបង្ហាញបន្ថែមទៀតថា យុទ្ធនាការបោះឆ្នោតដែលគ្របដណ្តប់ដោយការគំរាមកំហែងពីប្រធានាធិបតីអាមេរិក Donald Trump បានជំរុញអ្នកបោះឆ្នោតឲ្យចេញទៅទម្លាក់សន្លឹកឆ្នោត ក្នុងនោះរួមទាំងគាំទ្រខ្ពស់ខុសពីធម្មតា ចំពោះការជជែកដេញដោលចំនួន ២ដង កាលពីសប្តាហ៍មុនផងដែរ។

ប្រមុខគណបក្សសេរីនិយម (Liberal Party) លោកនាយករដ្ឋមន្ត្រី Mark Carney គឺជាអ្នកនាំមុខគេ ប៉ុន្តែការស្ទង់មតិមួយចំនួនបង្ហាញថា គណបក្សអភិរក្សនិយម (Conservative Party ) របស់លោក Pierre Poilievre មានការគាំទ្រកើនឡើង៕