ក្រុមមន្ត្រី បាននិយាយថា យានដ្រូនរបស់រុស្ស៊ីបានវាយប្រហារលើរថយន្តក្រុងដឹកបុគ្គលិកបម្រើការងារនៅក្នុងទីក្រុង Marhanets របស់អ៊ុយក្រែន នៅព្រឹកថ្ងៃពុធនេះ ដោយបានសម្លាប់មនុស្ស៩នាក់ នៅក្នុងរលកនៃការវាយប្រហារ ដែលបានដាក់គោលដៅលើហេដ្ឋារចនាសម្ព័ន្ធស៊ីវិលនៅភាគខាងកើត ភាគខាងត្បូង និងភាគកណ្តាលប្រទេសអ៊ុយក្រែន។

លោក Mykola Lukashuk ប្រធានក្រុមប្រឹក្សាតំបន់ Dnipropetrovsk បាននិយាយនៅលើបណ្តាញ Telegram ថា រុស្ស៊ី បានវាយប្រហារលើរថយន្តក្រុងដឹកបុគ្គលិកនៃសហគ្រាសមួយដែលកំពុងធ្វើដំណើរទៅធ្វើការនៅទីក្រុង Marhanets។

រូបថត ដែលត្រូវបានចេញផ្សាយដោយអង្គភាពសេវាសង្គ្រោះបន្ទាន់រដ្ឋរបស់អ៊ុយក្រែន បង្ហាញពីក្រុមអ្នកជួយសង្គ្រោះប្រមូលយកសាកសពចេញពីរថយន្តក្រុងដែលរងការបំផ្លាញ។ 

លោក Serhiy Lysak អភិបាលតំបន់ Dnipropetrovsk បាននិយាយថា មនុស្ស៩នាក់បានស្លាប់នៅក្នុងការវាយប្រហារនេះ ហើយយ៉ាងហោចណាស់មនុស្ស៣០ នាក់ បានរងរបួស។