អាជ្ញាធរស៊ីរី បាននិយាយកាលពីថ្ងៃអង្គារថា ពួកគេបានចាប់ខ្លួនអតីតមន្ត្រីម្នាក់ នៅក្នុងអង្គភាពសន្តិសុ របស់មេដឹកនាំដែលត្រូវបណ្តេញចេញពីតំណែងលោក បាសា អាល់អាសាដ (Bashar al-Assad) ដែលជាការប្រកាសចុងក្រោយបង្អស់ថា រដ្ឋាភិបាលថ្មីតាមចាប់ខ្លួនអតីតមន្ត្រីដែលត្រូវបានចោទប្រកាន់ពីបទប្រព្រឹត្តឃោរឃៅ។

ក្រសួងមហាផ្ទៃបានប្រកាសនៅក្នុងសេចក្តីថ្លែងការណ៍មួយថា កងកម្លាំងសន្តិសុខនៅក្នុងខេត្តមាត់សមុទ្រ Latakia បានចាប់ខ្លួន«លោកឧត្តមសេនីយ៍ទោ Sultan Al-Tinawi» ដោយនិយាយថា លោកជាមន្ត្រីសំខាន់នៅក្នុងអង្គភាពចារកម្មនៃកងទ័ពអាកាស ដែលជាភ្នាក់ងារសន្តិសុខមួយ ក្នុងចំណោមភ្នាក់ងារសន្តិសុខដែលគួរឲ្យទុកចិត្តបំផុតរបស់គ្រួសារលោក អាសាដ។

សេចក្តីថ្លែងការណ៍ បានចោទប្រកាន់លោក Tinawi ថា ជាប់ពាក់ព័ន្ធក្នុង «ប្រព្រឹត្តឧក្រិដ្ឋកម្មសង្គ្រាមប្រឆាំងនឹងជនស៊ីវិល រួមទាំងការសម្លាប់រង្គាលមួយ» នៅក្នុងទីជនបទនៃទីក្រុងដាម៉ាស ( Damascus) ក្នុងឆ្នាំ ២០១៦។

សេចក្តីថ្លែងការណ៍ បានបន្ថែមថា លោកទទួលខុសត្រូវចំពោះ «ការសម្របសម្រួលរវាងក្រុមមេដឹកនាំនៃកងជីវពលហេសបូឡានៅប្រទេសលីបង់ និងក្រុមប្រកាន់និកាយមួយចំនួន នៅប្រទេសស៊ីរី" ។

សេចក្តីថ្លែងការណ៍ បានឲ្យដឹងទៀតថា លោកTinawi ត្រូវបានបញ្ជូនទៅអយ្យការសាធារណៈសម្រាប់ការស៊ើបអង្កេតបន្ថែមទៀត។