អាជ្ញាធរសុខាភិបាលក្នុងតំបន់ បានឲ្យដឹងថា ការវាយប្រហារតាមអាកាសរបស់អ៊ីស្រាអែលទៅលើសាលារៀនមួយដែលជាទីកន្លែងផ្តល់ជម្រកដល់ក្រុមគ្រួសារជនភៀសខ្លួន នៅភាគខាងជើងតំបន់ហ្កាហ្សា បានសម្លាប់មនុស្សយ៉ាងហោចណាស់ ១០នាក់ ខណៈដែលការវាយប្រហារមួយទៀត បានត្រូវចំមន្ទីរពេទ្យកុមារ ដោយនាំឲ្យចំនួនអ្នកស្លាប់ឡើងដល់ទៅ ២០នាក់ នៅថ្ងៃពុធ (ទី២៣ ខែមេសា)។

ក្រុមគ្រូពេទ្យបឋមសង្គ្រោះ បានប្រាប់ថា ការវាយប្រហារតាមអាកាសទៅលើសាលារៀន Yaffa ក្នុងតំបន់ Tuffah នៃទីក្រុងហ្កាហ្សា បានធ្វើឲ្យតង់ និងសាលារៀនមានអគ្គិភ័យ។ មិនទាន់មានការអត្ថាធិប្បាយរបស់អ៊ីស្រាអែលនៅឡើយទេ ជុំវិញការវាយប្រហារសាលារៀន។

សាក្សីដែលបានឃើញផ្ទាល់ភ្នែក ឈ្មោះ Um Mohammed Al-Hwaiti បាននិយាយថា៖ «ពួកយើងកំពុងដេក ស្រាប់តែមានអ្វីមួយផ្ទុះឡើង យើងចាប់ផ្តើមរកមើល ហើយបានឃើញថា សាលារៀនទាំងមូល កំពុងត្រូវភ្លើងឆេះ តង់នៅត្រង់នេះ និងត្រង់នោះ ក៏មានភ្លើងឆេះដូចគ្នា។ អ្វីៗគ្រប់យ៉ាងត្រូវភ្លើងឆេះ»។

គួរបញ្ជាក់ថា បើយោងតាមអាជ្ញាធរសុខាភិបាលតំបន់ហ្កាហ្សា បានឲ្យដឹងថា ចាប់តាំងពីបទឈប់បាញ់ខែមករា បានដួលរលំ កាលពីថ្ងៃទី១៨ ខែមីនា ការវាយប្រហាររបស់អ៊ីស្រាអែល បានសម្លាប់ជនជាតិប៉ាឡេស្ទីនជាង ១.៦០០នាក់ ហើយរាប់រយពាន់នាក់ត្រូវបានបង្ខំឲ្យចាកចេញពីផ្ទះសម្បែងរបស់ពួកគេ ខណៈដែលអ៊ីស្រាអែល បានដណ្តើមកាន់កាប់អ្វីដែលខ្លួនហៅថា តំបន់ទ្រនាប់នៃដែនដីហ្កហ្សា៕