នៅថ្ងៃពុធនេះ ចិនបានប្រកាសពង្រឹងទំនាក់ទំនងរបស់ពួកគេជាមួយប្រទេសអាស៊ែបៃហ្សង់ ដល់កម្រិតភាពជាដៃគូយុទ្ធសាស្រ្តគ្រប់ជ្រុងជ្រោយ ។

ការបង្កើតភាពជាដៃគូនេះដែរ រួមទាំងការចុះហត្ថលេខាលើឯកសារកិច្ចសហប្រតិបត្តិការចំនួន ២០ដែលជាផ្នែកមួយនៃគំនិតផ្តួចផ្តើម “ខ្សែក្រវាត់មួយ ផ្លូវមួយ”របស់ចិន លើការអភិវឌ្ឍន៍បរិស្ថាន សេដ្ឋកិច្ចឌីជីថល កម្មសិទ្ធិបញ្ញា និងអវកាស ។

ប្រធានាធិបតីចិនលោក Xi Jinping បានស្វាគមន៍សមភាគីអាស៊ែបៃហ្សង់លោក Ilham Aliyevនៅទីក្រុងប៉ែកាំង ជាទីដែលមេដឹកនាំទាំង ២ បានចូលរួមពិធីស្វាគមន៍ មុនពេលអង្គុយចរចា ។

ជាប់ព្រំដែនជាមួយអ៊ីរ៉ង់ រុស្ស៊ី ហ្សកហ្ស៊ី និងអាមេនី អាស៊ែបៃហ្សង់ស្ថិតក្នុងចំណោមប្រទេសដំបូងគេ បន្តឥទ្ធិពលសេដ្ឋកិច្ច និងភូមិសាស្រ្តនយោបាយចិន តាមរយៈការជំរុញការអភិវឌ្ឍហេដ្ឋារចនាសម្ព័ន្ធសកល ។

លោក Aliyev ស្ថិតនៅលើដំណើរទស្សនកិច្ចផ្លូវរដ្ឋទៅកាន់ចិន ចាប់ពីថ្ងៃទី ២២ ដល់ថ្ងៃទី ២៤ ខែមេសា ៕