ភ្ញៀវទេសចរដែលបានបង្ហាញក្តីបារម្ភរបស់ពួកគេចំពោះសុវត្ថិភាព នៅដែនដីសហព័ន្ធចាមមូ និងកាស្មៀរ ប្រទេសឥណ្ឌា បានរត់ភៀសខ្លួនចេញពីតំបន់ភ្នំ Pahalgam នាព្រឹកថ្ងៃពុធនេះ បន្ទាប់ពីការវាយប្រហារស្លាប់មនុស្សរបស់ក្រុមជីវពលនៅក្នុងតំបន់ ។

នគរបាលបាននិយាយថា មនុស្ស ២៦នាក់ បានស្លាប់ និង ១៧នាក់ រងរបួស នៅពេលដែលក្រុមសកម្មប្រយុទ្ធសង្ស័យថាបានបើកការបាញ់ប្រហារទៅលើអ្នកទេសចរមួយក្រុមនៅក្នុងទឹកដី ចាមមូ និង កាស្មៀរ គ្រប់គ្រងដោយឥណ្ឌា ដែលជាការវាយប្រហារដ៏អាក្រក់បំផុតនៅប្រទេសនេះ ក្នុងពេលជិត ២ទសវត្សរ៍ ។ 

ការវាយប្រហារនោះបានកើតឡើងកាលពីថ្ងៃអង្គារម្សិលមិញ នៅក្នុងតំបន់ទេសចរណ៍ដ៏ពេញនិយម Pahalgam នៃទឹកដីសហព័ន្ធតំបន់ភ្នំហិម៉ាឡៃមួយនេះ ដែលបានមើលឃើញការងើបឡើងវិញនៃវិស័យទេសចរណ៍ដ៏ធំ ខណៈអំពើហិង្សាពីក្រុមបះបោរ ទើបតែបានធ្លាក់ចុះបន្តិចក្នុងរយៈពេលប៉ុន្មានឆ្នាំមកន្លងមកនេះ ។

ភ្ញៀវទេសចរមួយរូបមកពីទីក្រុងញូវ ដែល្លី និយាយថា តើឲ្យពួកយើងបន្តដំណើរទេសចរណ៍ នៅក្នុងស្ថានភាពបែបនេះយ៉ាងម៉េចកើត? ពួកយើងត្រូវការផ្តល់អាទិភាពដល់សុវត្ថិភាពរបស់ពួកយើង ។

នេះជាការវាយប្រហារដ៏អាក្រក់បំផុតលើជនស៊ីវិលនៅឥណ្ឌា ចាប់តាំងពីការបាញ់ប្រហារនៅក្រុងបុមបៃ កាលពីឆ្នាំ២០០៨ ពេលដែលមនុស្សជាង ១៦០នាក់ត្រូវបានសម្លាប់ ។ 

នគរបាលនិយាយថា ការវាយប្រហារបានកើតឡើងនៅតំបន់វាលស្មៅ ហើយអ្នកស្លាប់រួមមានជនជាតិឥណ្ឌា ២៥នាក់ និងជនជាតិនេប៉ាល់ម្នាក់ ៕