លោកប្រធានាធិបតី Vladimir Putin នៅថ្ងៃពុធ (ទី២៣ ខែមេសា) បាននិយាយថា កងកម្លាំងប្រដាប់អាវុធរបស់រុស្ស៊ី នៅតែខ្វះខាតអាវុធមួយចំនួន ក្នុងនោះរួមទាំងយានដ្រូនផងដែរ បើទោះបីជាមានការកើនឡើងនូវផលិតកម្មក៏ដោយ។

លោក Putin បានប្រាប់កិច្ចប្រជុំនៃគណៈកម្មការយោធា-ឧស្សាហកម្មរដ្ឋថា សហគ្រាសវិស័យការពារជាតិ ស្ទើរតែទាំងអស់ បានបំពេញតាមការបញ្ជាទិញពេញមួយឆ្នាំកន្លងមក។ នៅក្នុងការអត្ថាធិប្បាយតាមកញ្ចក់ទូរទស្សន៍ លោកបានលើកឡើងថា៖ «ជាឧទាហរណ៍ ការផលិតអាវុធ ឧបករណ៍ទំនាក់ទំនង ឧបករណ៍ឈ្លបយកការណ៍ និងប្រព័ន្ធធ្វើសង្គ្រាមអេឡិចត្រូនិក បានកើនឡើងទ្វេដង។ កងទ័ពបានទទួលរថពាសដែកជាង ៤.០០០គ្រឿង យន្តហោះប្រយុទ្ធ និងឧទ្ធម្ភាគចក្រ ១៨០គ្រឿង»។

លោក Putin បានបន្ថែមថា យានដ្រូនជាង ១,៥លានគ្រឿង ក្នុងប្រភេទផ្សេងៗគ្នា ក៏ត្រូវបានផលិតផងដែរ ក្នុងនោះមានរួមទាំងយានដ្រូនទម្ងន់ស្រាល ៤.០០០គ្រឿងដែលត្រូវបានរចនាឡើង សម្រាប់ការកំណត់គោលដៅច្បាស់លាស់។ ប៉ុន្តែលោក Putin បានបញ្ជាក់ថា៖ «ខ្ញុំដឹងយ៉ាងច្បាស់ ហើយមនុស្សជាច្រើននៅទីនេះ ដែលចូលរួមក្នុងកិច្ចប្រជុំរបស់យើងថ្ងៃនេះ ដឹងអំពីបញ្ហានេះ ដូចជាខ្ញុំដែរ នោះគឺថា អាវុធទាំងនេះ នៅមិនទាន់គ្រប់គ្រាន់នៅឡើយទេ។ មិនទាន់គ្រប់ពិតមែន»។

ការអត្ថាធិប្បាយរបស់លោក Putin បានបង្ហាញសញ្ញាថា រុស្ស៊ីមានបំណងបង្កើនការផលិតគ្រឿងយុទ្ធោបករណ៍បន្ថែមទៀត ដើម្បីយកទៅប្រើប្រាស់ ក្នុងសង្រ្គាមរយៈពេល ៤ឆ្នាំរបស់ខ្លួន នៅអ៊ុយក្រែន បើទោះបីជាខ្លួនកំពុងពិភាក្សាជាមួយសហរដ្ឋអាមេរិក ស្តីពីលទ្ធភាពនៃការបញ្ចប់ជម្លោះក៏ដោយ៕